خیبر پختونخوا کلچر اینڈ ٹورازم اتھارٹی کے زیراہتمام اپر چترال کی وادی تورکھو میں منعقدہ تین روزہ شاقلشٹ فیسٹیول اختتام پذیر ہوگیا۔ اختتامی تقریب کے مہمان خصوصی جنرل منیجر خیبر پختونخوا کلچر اینڈ ٹورازم اتھارٹی محمد علی سید تھے۔ تقریب سے خطاب کرتے ہوئے جی ایم محمد علی سید نے کہاکہ ڈپٹی اسپیکرصوبائی اسمبلی خیبر پختونخوا ثریا بی بی کی ہدایات پر شاقلشٹ فیسٹیول کا انعقاد کیا گیا تھا جس میں مختلف کھیلوں کے مقابلے منعقد ہوئے۔ شاقلشٹ فیسٹیول سے اپر چترال میں سیاحت کو فروغ ملے گا اور اس وادی کی جانب سیاحوں کا رخ بڑھے گا۔ فٹبال کا فائنل الشباب( FC) مداک نے (Felly FC) کوشٹ کو پنلٹی شوٹ کے ذریعے شکست دی۔ کرکٹ کے فائنل میں اسٹار الیون تریچ نے ہیڈ کوارٹر بونی کو ہرا کر ٹرافی اپنے نام کرلی۔ والی بال کے فائنل میں شوتخر والی بال ٹیم کھوت والی بال ٹیم کو ہرا کر فاتح قرار پائی جبکہ پاٹیک دیک کے مقابلے میں پھور کھوت کی معروف شخصیت غلام حسین نے کامیابی حاصل کی۔ الشباب (FC) مداک کے نوجوان کھلاڑی مستنصر آف بونی ٹورنامنٹ کے بہترین کھلاڑی قرارپائے۔ جنرل منیجر ٹورازم اتھارٹی محمد علی سید کا مزید کہنا تھا کہ شاقلشٹ فیسٹیول منی شندور میلے جیسا ہے۔ اگلے سال اس فیسٹیول کومزید شایان شان طریقے سے منایا جائے گااورساتھ ہی اس فیسٹیول میں پولو کو بھی شامل کریں گے۔ واضح رہے کہ اس سال شاقلشٹ فیسٹیول خیبر پختونخوا کلچر اینڈ ٹورازم کی زیر نگرانی منعقد کیا گیا۔ اس سال کئی ٹیمیں تریچ میر کی طرف جارہی ہیں اور اگست کے آخر تک یہ سلسلہ جاری رہے گا۔ اس اقدام کا مقصد سیاحوں کا رخ ان خوبصورت وادیوں کی جانب راغب کرنا تھا جس سے اس علاقے میں سیاحت کو مزید فروع ملے گااور لوگوں کو روزگار کے مواقع میسر آسکیں گے۔ آخر میں ونر اور رنر اپ ٹیموں میں انعامات تقسیم کیے گئے۔ اختتامی تقریب سے تحصیل چیئرمین تورکھو موڑکھو جمشید میر نے بھی خطاب کیا۔