’’اب کسی بالی ووڈ سیلیبرٹی پر اعتبار نہیں کیا جا سکتا‘‘
’’اجے دیوگن صرف اسکرین پر بھارت سے محبت کرتے ہیں، اصل زندگی میں نہیں‘‘
’’ان کی آنے والی فلم کا بائیکاٹ کریں، بس بہت ہو گیا‘‘
یہ وہ جملے ہیں جو سوشل میڈیا پر بالی وڈ اسٹار اجے دیوگن کے خلاف شدت سے گردش کر رہے ہیں، اور وجہ بنی ہے ان کی ایک پرانی تصویر، جس میں وہ سابق پاکستانی کرکٹر شاہد آفریدی کے ساتھ خوشگوار موڈ میں نظر آ رہے ہیں۔
اجے دیوگن کی شاہد آفریدی سے تصویر پر ہنگامہ کیوں؟
یہ تصویر دراصل جولائی 2024 میں ورلڈ چیمپیئن شپ آف لیجنڈز کے دوران لی گئی تھی جب دونوں شخصیات نے برمنگھم میں ایک دوسرے سے ملاقات کی۔ تاہم، یہ تصویر حالیہ پاک-بھارت کشیدگی اور 2025 کے ورلڈ چیمپیئن شپ آف لیجنڈز کے ایک اہم میچ کی منسوخی کے بعد اچانک دوبارہ وائرل ہو گئی۔ میچ کی منسوخی کی ممکنہ وجہ بھارت کی جانب سے شاہد آفریدی کی شمولیت پر اعتراض بتائی جا رہی ہے۔
View this post on Instagram A post shared by Film Window (@film.window)
تصویر وائرل ہونے کے ساتھ ہی بھارتی سوشل میڈیا پر اجے دیوگن پر تنقید کا طوفان آ گیا۔ صارفین نے اُن پر ’دوغلا رویہ‘ رکھنے، ’ملک دشمنوں سے تعلقات‘ رکھنے اور ’محض فلموں میں دیش بھکتی دکھانے‘ کے الزامات لگائے۔
سوشل میڈیا کا غصہ یا غلط فہمی؟
دلچسپ بات یہ ہے کہ تصویر کے حوالے سے متعدد صارفین نے واضح کیا کہ یہ حالیہ نہیں بلکہ ایک سال پرانی ہے۔ انہوں نے کہا کہ اس تصویر کا موجودہ میچ منسوخی یا حالیہ کشیدگی سے کوئی تعلق نہیں۔ لیکن تنقید کرنے والوں کو شاید اس وضاحت سے کچھ خاص فرق نہیں پڑا۔
ورلڈ چیمپیئن شپ آف لیجنڈز کی حقیقت کیا ہے؟
یہ ٹی 20 طرز کا ٹورنامنٹ ہے جو اگرچہ انگلینڈ اینڈ ویلز کرکٹ بورڈ سے منظور شدہ ہے، لیکن اسے مکمل بین الاقوامی درجہ حاصل نہیں۔ اس ایونٹ کے شریک مالکان میں بالی وڈ اداکار اجے دیوگن اور بھارتی ریپر ہرشت تومر شامل ہیں۔
2024 میں اس ٹورنامنٹ کا پہلا ایڈیشن ہوا تھا جس میں انڈیا چیمپیئنز نے فائنل میں پاکستان چیمپیئنز کو پانچ وکٹوں سے شکست دی تھی۔
2025 کے جاری ایڈیشن میں پاک-بھارت ٹاکرا سب کی توجہ کا مرکز تھا، لیکن میچ منسوخی کے بعد سوشل میڈیا پر جذبات بھڑک اٹھے اور اجے دیوگن اُس کا غیر متوقع نشانہ بن گئے۔
منتظمین کی وضاحت
صورتحال کی سنگینی کو بھانپتے ہوئے منتظمین کی جانب سے وضاحت جاری کی گئی ہے کہ ایونٹ کے باقی میچز معمول کے مطابق جاری رہیں گے اور وائرل تصویر کا حالیہ تنازع سے کوئی تعلق نہیں۔
سوال اٹھتا ہے...
یہ واقعہ نہ صرف شوبز اور اسپورٹس کی دنیا میں سیاست کی دراندازی کو ظاہر کرتا ہے بلکہ اس بات کی بھی نشاندہی کرتا ہے کہ وائرل مواد کس طرح سچ اور جھوٹ کی سرحدیں دھندلا سکتا ہے۔ ایک سال پرانی تصویر آج اجے دیوگن کے کیریئر اور ساکھ پر سوالیہ نشان بن گئی ہے، جس کی قیمت شاید وہ اپنی آنے والی فلم کی بائیکاٹ مہم میں چکائیں۔