جی میل دنیا کی مقبول ترین جی میل سروس ہے اور یہ گوگل کی ملکیت ہے۔ گوگل وہ کمپنی ہے جس کی ہر سروس بشمول سرچ، یوٹیوب ور دیگر میں اشتہارات کی بھرمار ہوتی ہے۔ اب گوگل کی جانب سے جی میل میں بھی اشتہارات کے ایک نئے فارمیٹ کی آزمائش کی جا رہی ہے۔ ایک رپورٹ میں بتایا گیا کہ گوگل کی جانب سے ایک ایسے نئے اشتہاری فارمیٹ کی آزمائش کی جا رہی ہے جس کے ذریعے شاپنگ فیچرز کو براہ راست جی میل کا حصہ بنایا جائے گا۔ اس نئی تبدیلی میں گوگل کی جانب سے جی میل کے پروموشنز ٹیب پر توجہ مرکوز کی گئی ہے جہاں اشتہارات کو نئے انداز کے ڈسپلے کے ساتھ پیش کیا جائے گا۔ جب کسی اشتہار پر کلک کیا جائے گا تو وہ کھل جائے گا اور تصاویر، قیمت، ایوریج سٹار ریٹنگ اور ایسی دیگر تفصیلات نظر آئیں گی۔ یہ نیا اشتہاری فارمیٹ جی میل کی پروموشنز ٹیب کو مارکیٹنگ ای میلز کے فولڈر کی بجائے شاپنگ پلیٹ فارم میں تبدیل کر دے گا۔