لیاری کی رہائشی عمارت گرنے کے دلخراش واقعے پر جونیئر ذوالفقار علی بھٹو نے متاثرین کے ہمراہ پریس کانفرنس کرتے ہوئے حکومت سے جوڈیشل انکوائری اور متاثرہ خاندانوں کو فوری مالی امداد فراہم کرنے کا مطالبہ کیا۔ انہوں نے مطالبہ کیا کہ سانحہ میں مرنے والوں کے لواحقین کو کم از کم 50 لاکھ روپے فی کس فوری معاوضہ دیا جائے جبکہ دیگر متاثرین کو بھی مالی امداد فراہم کی جائے تاکہ وہ اس مشکل وقت میں سہارا حاصل کر سکیں۔ جونیئر ذوالفقار علی بھٹو نے پریس کانفرنس میں کہا کہ میں کچھی مہیشوری برادری اور لاسی برادری کے ساتھ ہوں اور ان کے حقوق کے لیے ہر فورم پر آواز بلند کروں گا۔ انہوں نے حکومت سے مطالبہ کیا کہ عمارت گرنے کے واقعے کی جوڈیشل انکوائری کرائی جائے تاکہ ذمہ داران کا تعین ہو سکے اور متاثرہ خاندانوں کو انصاف مل سکے۔ اس موقع پر انہوں نے یہ بھی کہا کہ لیاری کے کرایہ داروں کے تحفظ کیلئے جامع پالیسی مرتب کی جائے اور انہیں بھی متبادل رہائش اور مالی امداد دی جائے۔