الیکشن کمیشن آف پاکستان نے 9 مئی کے پرتشدد واقعات میں سزا یافتہ ہونے پر تحریک انصاف کے رکن قومی اسمبلی عبداللطیف چترالی کو نااہل قرار دے دیا ہے۔ الیکشن کمیشن نے عبداللطیف چترالی کی نااہلی کا نوٹیفکیشن جاری کرتے ہوئے این اے-1 چترال کی نشست کو خالی قرار دے دیا ہے۔ نوٹیفکیشن کے مطابق عبداللطیف چترالی کو آئین کے آرٹیکل 63 ون ایچ کے تحت نااہل قرار دیا گیا ہے۔ یاد رہے کہ عبداللطیف چترالی کو 9 مئی کے واقعات میں عدالت سے سزا ہوئی تھی جس کے بعد الیکشن کمیشن نے ان کی نااہلی پر فیصلہ محفوظ کیا تھا۔ اس سے قبل بھی تحریک انصاف کے رہنما بشمول سینیٹر اعجاز چوہدری، ایم این اے محمد احمد چٹھہ اور اپوزیشن لیڈر پنجاب اسمبلی احمد خان کو عدالت سے 10،10 سال قید کی سزا ملنے کے بعد نااہل قرار دیا جا چکا ہے۔