"یہ جو آج کل ہر جگہ عائشہ خان اور حمیرا اصغر کی لاشوں کی بات ہو رہی ہے، کیا لوگوں کو یاد ہے کہ جاوید فاضل بھی کراچی کے ایک فلیٹ سے مردہ حالت میں ملے تھے؟ کوئی ذکر نہیں کرتا، سب کچھ بھول گئے۔" یہ جملے اداکار محسن گیلانی نے ایک حالیہ پوڈکاسٹ میں ادا کیے، جہاں وہ ماضی کی تلخ حقیقتوں کو یاد کرتے ہوئے خاصے جذباتی دکھائی دیے۔ انہوں نے شوبز انڈسٹری میں معاوضے کی تاخیر سے لے کر کراچی میں حالیہ پراسرار اموات تک کئی حساس موضوعات پر کھل کر گفتگو کی۔ محسن گیلانی کا کہنا تھا کہ فلم ساز جاوید فاضل کی موت بھی کچھ کم دل دہلا دینے والی نہیں تھی، مگر وقت نے ان کی یادیں دھندلا دی ہیں۔ انہوں نے بتایا کہ فاضل صاحب کے ساتھ وہ خود بھی ایک پراجیکٹ میں کام کر رہے تھے، جس دن شوٹنگ تھی، پوری ٹیم وقت پر پہنچ گئی مگر ہدایت کار کا کوئی اتا پتا نہ تھا۔ "ہم نے رابطہ کیا، آس پاس کے لوگوں سے پوچھا، پھر گیسٹ ہاؤس کے عملے سے بات ہوئی تو پتا چلا وہ صبح سے کمرے سے باہر ہی نہیں آئے۔ جب کمرہ کھولا گیا تو جاوید فاضل بےجان حالت میں پائے گئے۔" ان کا کہنا تھا کہ جاوید فاضل اس وقت کے بڑے نام تھے، مگر اب انہیں شاید ہی کوئی یاد کرتا ہو۔ ان کے بقول، جیسے جیسے وقت گزرتا ہے، یادیں بھی دم توڑ دیتی ہیں، صرف تازہ زخم لوگوں کو نظر آتے ہیں۔ View this post on Instagram A post shared by Galaxy Lollywood (@galaxylollywood) واضح رہے کہ جاوید فاضل کی لاش دسمبر 2011 میں کراچی کے ایک فلیٹ سے ملی تھی۔ ان کا تعلق لاہور سے تھا اور ان کے انتقال کے وقت ان کی بیوی اور بچے بیرون ملک مقیم تھے، جو ان کی وفات کے بعد پاکستان واپس آئے۔ شاید محسن گیلانی کا یہ جملہ آج کی انڈسٹری کے لیے لمحۂ فکریہ ہے کہ "مشہوریاں لمحاتی ہوتی ہیں، مگر تنہائی اور انجام… اکثر خاموش ہوتے ہیں۔"