پاکستانی اسکواش پلیئر اشعب عرفان نے امریکا میں کھیلے گئے جونز کریک اوپن اسکواش ٹورنامنٹ کا ٹائٹل اپنے نام کر لیا۔ 12 ہزار ڈالر انعامی رقم کے حامل اس ٹورنامنٹ کے فائنل میں اشعب عرفان نے ملائیشیا کے کھلاڑی نیتھن کیوے کو شکست دی۔ فائنل میچ میں اشعب عرفان نے شاندار کھیل کا مظاہرہ کرتے ہوئے 40 منٹ میں 1-3 سے کامیابی حاصل کی۔ پاکستانی کھلاڑی نے پہلا گیم 8-11 سے ہارنے کے بعد شاندار کم بیک کیا اور اگلے تین گیمز 11-2، 11-2 اور 11-6 سے جیت کر ٹائٹل اپنے نام کیا۔ واضح رہے کہ یہ رواں سال اشعب عرفان کا تیسرا پی ایس اے ٹائٹل ہے جو پاکستانی اسکواش کے لیے ایک خوش آئند پیش رفت قرار دی جا رہی ہے۔