"عمران عباس فلموں کے لیے موزوں نہیں، وہ تو مرد جیسے بھی نہیں لگتے۔ فواد خان حد سے زیادہ بڑھا چڑھا کر پیش کیا گیا ہے، وہ اتنے قابل بھی نہیں۔ احسن خان اور فیصل قریشی ٹی وی کے لیے ٹھیک ہیں مگر فلموں کے لیے نہیں۔ حمزہ علی عباسی واحد اداکار ہے جو فلموں میں کام کر سکتا ہے۔ جہاں تک فہد مصطفیٰ کا تعلق ہے، وہ طارق عزیز کی طرح ہوسٹ بن سکتا ہے مگر اس کی اداکاری کی رینج محدود ہے۔" ببرک شاہ فلمی گھرانے سے تعلق رکھنے والے اداکار ببرک شاہ نے پروگرام "سنو تو صحیح" میں موجودہ سپر اسٹارز پر کھل کر رائے دی اور ان پر سخت تنقید کی۔ انہوں نے کہا کہ وہ سچ بولنے سے نہیں گھبراتے اور آج کے مشہور اداکار زیادہ تر فلمی معیار پر پورا نہیں اترتے۔ ان کے ان بیانات کے بعد سوشل میڈیا پر بحث چھڑ گئی۔ کچھ صارفین نے کہا کہ ببرک شاہ صرف حسد کی وجہ سے ایسی باتیں کر رہے ہیں۔ ایک نے لکھا: "یہ ہماری ہی خامی ہے کہ ہم اپنے سے بہتر ٹیلنٹ کو مان نہیں سکتے۔" ایک اور نے طنزیہ انداز میں کہا: "مجھے بھی اس طرح کا کانفیڈنس چاہیے۔" تاہم کچھ صارفین ببرک شاہ کی بات سے متفق بھی نظر آئے اور کہا کہ واقعی عمران عباس کا چہرہ بڑے پردے پر اچھا نہیں لگتا۔ ببرک شاہ کے ان بیانات نے موجودہ دور کے کامیاب اداکاروں کے مداحوں اور ناقدین کے درمیان ایک نئی بحث چھیڑ دی ہے۔