رائیونڈ میں 30 روپے کے تنازع پر ہونے والےدو بھائیوں کے قتل کیس میں اہم پیش رفت ہوئی ہے۔ پولیس نے واقعے میں ملوث مرکزی ملزم اویس کو گرفتار کرلیا ہے۔ ملزم اویس کی مقتول کو بلا مارنے کی فوٹیج بھی منظر عام پر آئی تھی جس کے بعد کارروائی تیز کی گئی۔واقعے میں ملوث دو ملزمان کو اب تک گرفتار کیا جا چکا ہے جبکہ مزید چار ملزمان کی گرفتاری کے لیے چھاپے مارے جا رہے ہیں جبکہ واقعے کی تفتیش سی سی ڈی چوہنگ کے حوالے کر دی گئی ہے۔ یاد رہے کہ یہ افسوسناک واقعہ تھانہ رائیونڈ سٹی کے علاقے میں پیش آیا تھا جہاں صرف 30 روپے کے تنازع پر پھل فروش اور اس کے ساتھیوں نے دو بھائیوں پر تشدد کیا۔ جھگڑے میں دونوں بھائی شدید زخمی ہوئے جنھیں اسپتال منتقل کیا گیا۔ تاہم 21 سالہ واجد زخموں کی تاب نہ لاتے ہوئے دم توڑ گیا جبکہ 17 سالہ راشد بھی آئی سی یو میں زندگی کی بازی ہار گیا۔ پولیس کے مطابق نوجوانوں کے والد کی مدعیت میں مقدمہ درج کیا گیا جس کے بعد ایک ملزم تیمور کو پہلے ہی گرفتار کیا جا چکا تھا۔