"یہ کامیاب شادی نہیں بلکہ صرف سمجھوتہ ہے۔" "وہ بالکل درست کہہ رہی ہیں۔ میری اور میری بیوی کی طویل ازدواجی زندگی بھی ایسے ہی چلی۔" فریدہ شبیر، جو پاکستان کی سینئر اداکارہ اور نامور فنکار شبیر جان کی شریکِ حیات ہیں، نے حال ہی میں ایک انٹرویو میں شادی کو کامیاب بنانے کے راز بتائے تو سوشل میڈیا پر بحث چھڑ گئی۔ دونوں فنکار کئی دہائیوں سے شوبز کا حصہ ہیں اور ایک دوسرے کے ساتھ زندگی کے نشیب و فراز کا سامنا کرچکے ہیں۔ یہ دونوں کی دوسری شادی تھی اور ہمیشہ انہوں نے اپنی جدوجہد اور رشتے کے اتار چڑھاؤ کو کھل کر بیان کیا ہے۔ نجی ٹی وی کے پروگرام میں گفتگو کرتے ہوئے فریدہ شبیر نے کہا کہ شادی کو کامیاب بنانے کے لیے دونوں ساتھیوں کو ایک ساتھ غصے میں نہیں آنا چاہیے۔ انہوں نے اپنی مثال دیتے ہوئے بتایا کہ شوبز انڈسٹری کی نوعیت کو سمجھنا ان کے لیے آسان تھا کیونکہ وہ خود بھی اس شعبے سے وابستہ تھیں۔ اس کے باوجود انہوں نے رشتے کو چلانے کے لیے کئی مرتبہ خاموشی اختیار کی۔ ان کا کہنا تھا کہ جب بھی شبیر جان غصے میں ہوتے تو وہ بولنے کے بجائے خاموش ہوجاتی تھیں۔ اگرچہ انہوں نے اعتراف کیا کہ یہ طریقہ ہمیشہ درست نہیں تھا، لیکن ان کے بقول جب ان کے بچے بڑے ہوگئے تو انہوں نے خاموش رہنے کے بجائے جواب دینا شروع کردیا۔ فریدہ شبیر کے اس بیان نے انٹرنیٹ پر دو مختلف رائے پیدا کیں۔ کچھ لوگوں نے ان کی بات کو شادی کا عملی نسخہ قرار دیا جبکہ کئی صارفین نے اسے صرف "سمجھوتہ" کہہ کر تنقید کی۔ اس گفتگو نے یہ سوال بھی کھڑا کردیا ہے کہ آخر شادی میں سمجھوتہ اور کامیابی کے بیچ کی لکیر کہاں کھنچی جاتی ہے۔