محکمہ موسمیات کا کہنا ہے کہ پیر کی شام یا رات سے خیبرپختونخوا میں ایک طاقتور موسمی سسٹم داخل ہوگا جس کے باعث صوبے کے مختلف علاقوں میں شدید گرج چمک، موسلادھار بارشیں اور آندھی طوفان کا امکان ہے۔ محکمہ موسمیات کے مطابق یہ سسٹم مون سون ہواؤں اور افغانستان سے آنے والی مغربی ہواؤں کی وجہ سے بن رہا ہے جو کئی علاقوں کو متاثر کرے گا۔ مختلف مقامات پر تیز ہوائیں، ژالہ باری اور آسمانی بجلی گرنے کا بھی امکان ہے۔ بالائی علاقوں جیسے کالام، مالم جبہ، ناران اور کاغان میں ہلکی برفباری کی کا بھی امکان ظاہر کیا گیا ہے جو درجہ حرارت میں کمی کا باعث بن سکتی ہے۔ ماہرین نے پہاڑی علاقوں میں لینڈ سلائیڈنگ کے خدشے کے پیش نظر شہریوں کو محتاط رہنے اور محفوظ مقامات پر رہائش اختیار کرنے کی ہدایت کی ہے اور عوام کو مشورہ دیا گیا ہے کہ بجلی کے کھمبوں سے دور رہیں تاکہ کسی ناخوشگوار واقعے سے محفوظ رہا جا سکے۔