وزیر اعلیٰ بلوچستان کے وژن کے تحت محکمہ ماہی گیری نے غیر قانونی ٹرالنگ کی روک تھام کے لیے سخت اقدامات کا فیصلہ کیا ہے۔
ڈائریکٹر جنرل فشریز بلوچستان عتیق اللہ خان نے گوادر کے سمندری علاقوں کا دورہ کیا اور غیر قانونی ٹرالنگ کی صورتحال کا جائزہ لیا۔ ان کے ہمراہ اسسٹنٹ ڈائریکٹر گوادر شاہ فہد انور، میرین بائیولوجسٹ نعمت اللہ زہری، انسپکٹر عبدالباسط، اسکیپر محمد یاسین اور دیگر عملہ بھی موجود تھا۔
اس موقع پر ڈی جی فشریز کو تفصیلی بریفنگ دی گئی جس کے بعد فیصلہ کیا گیا کہ مقامی ماہی گیروں کے حقوق کے تحفظ اور سمندری وسائل کے پائیدار استعمال کو یقینی بنانے کے لیے ہر ممکن اقدامات کیے جائیں گے۔
محکمہ فشریز کا کہنا ہے کہ ماہی گیروں کے معاشی مفادات اور ساحلی وسائل کے تحفظ کے لیے کوئی سمجھوتہ نہیں کیا جائے گا۔