اسلام آباد کے معروف شاپنگ مال سینٹورس میں ایک خاتون سے مبینہ طور پر اجتماعی زیادتی کا واقعہ پیش آیا ہے، جس کے الزام میں پولیس نے دو ملزمان کو حراست میں لے لیا ہے۔یہ واقعہ منگل کی سہ پہر پیش آیا، جس کی اطلاع متاثرہ خاتون نے شام کے وقت خود پولیس کو 15 پر دی۔اردو نیوز نے متعلقہ تھانہ مارگلہ کے سٹیشن ہاؤس آفیسر(ایس ایچ او) سلیم رضا سے رابطہ کیا تو انہوں نے اس بات کی تصدیق کی کہ خاتون کی جانب سے دو افراد پر مبینہ زیادتی کا الزام عائد کیا گیا ہے۔ایس ایچ او سلیم رضا کے مطابق یہ فلیٹ دو لڑکوں نے کرائے پر لیا ہوا تھا، جنہوں نے خاتون کو وہاں بلایا۔ دونوں ملزمان کو حراست میں لے لیا گیا ہے۔اسلام آباد پولیس کے مطابق اس واقعے کے خلاف تھانہ مارگلہ میں ایف آئی آر کے اندراج کا عمل شروع کر دیا گیا ہے اور امکان ہے کہ ایف آئی آر آج ہی درج کر لی جائے گی۔پولیس کا کہنا ہے کہ متاثرہ خاتون کو پمز ہسپتال منتقل کر دیا گیا ہے جہاں ان کا میڈیکل معائنہ کیا جا رہا ہے تاکہ یہ تصدیق کی جا سکے کہ آیا ان کے ساتھ واقعی زیادتی ہوئی ہے یا نہیں۔اردو نیوز کو موصول معلومات کے مطابق 15 پر کال موصول ہونے کے فوری بعد پولیس موقع پر پہنچ گئی اور وہاں موجود دو مشتبہ ملزمان کو گرفتار کر لیا گیا۔واقعے سے متعلق اسلام آباد پولیس کے ترجمان کا کہنا ہے کہ ’پولیس کی جانب سے تمام پہلوؤں پر تفتیش جاری ہے، کسی کے ساتھ ناانصافی نہیں ہوگی، اور اگر زیادتی ثابت ہوئی تو ملزمان کو قانون کے مطابق سزا دلوائی جائے گی۔‘