محکمہ موسمیات نے بحیرہ عرب میں بننے والے موسمیاتی سسٹم کے حوالے سے تیسرا واچ الرٹ جاری کرتے ہوئے بتایا ہے کہ جنوبی مشرقی عرب سمندر میں موجود ڈپریشن شمال مشرق کی جانب بڑھ رہا ہے۔ محکمہ موسمیات کے مطابق گزشتہ 24 گھنٹوں کے دوران یہ ڈپریشن مزید منظم ہوا ہے اور اسی پیش رفت کو مدنظر رکھتے ہوئے الرٹ جاری کیا گیا ہے۔ سسٹم کا مرکز اس وقت 13.3 شمالی عرض بلد اور 70.5 مشرقی طول بلد پر موجود ہے جو کراچی سے تقریباً 1340 کلومیٹر جنوب مشرق میں واقع ہے۔ مزید بتایا گیا کہ یہ نظام بھارت کے جزائر لکشدیپ سے تقریباً 340 کلومیٹر شمال مغرب کی سمت میں ہے اور آئندہ 24 گھنٹوں کے دوران اس کے مشرقی عرب سمندر میں مزید شمال مشرق کی طرف پیش قدمی کرنے کا امکان ہے۔ محکمہ موسمیات کے مطابق فی الحال اس موسمیاتی سسٹم سے پاکستانی ساحلی پٹی کو کوئی خطرہ نہیں، تاہم صورتِ حال کا باریک بینی سے جائزہ لیا جا رہا ہے۔ ٹراپیکل سائیکلون وارننگ سینٹر مسلسل سسٹم کی نگرانی کر رہا ہے اور متعلقہ اداروں کو بروقت آگاہ رکھا جا رہا ہے۔