بلوچستان کے مختلف علاقوں میں سیکیورٹی فورسز کی بروقت اور مؤثر کارروائیوں کے دوران بھارتی حمایت یافتہ فتنۃ الہندوستان سے تعلق رکھنے والے 18 دہشت گرد ہلاک ہو گئے۔ پاک فوج کے شعبہ تعلقات عامہ کے مطابق 28 اور 29 اکتوبر کو کوئٹہ کے علاقے چلتن اور کیچ کے علاقے بلیدہ میں دو الگ الگ انٹیلی جنس بیسڈ آپریشنز کیے گئے۔ پہلا آپریشن چلتن کی پہاڑیوں میں دہشت گردوں کی موجودگی کی اطلاع پر کیا گیا جہاں سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا۔ شدید فائرنگ کے تبادلے میں 14 بھارتی اسپانسرڈ دہشت گرد ہلاک ہوگئے۔ دوسری کارروائی ضلع کیچ کے علاقے بلیدہ میں کی گئی جہاں فورسز نے دہشت گردوں کے ایک ٹھکانے کو تباہ کیا۔ اس آپریشن میں 4 دہشت گرد مارے گئے۔ ترجمان کے مطابق مارے گئے دہشت گرد متعدد تخریبی کارروائیوں میں ملوث تھے ان کے قبضے سے بھاری مقدار میں اسلحہ، گولہ بارود اور دھماکا خیز مواد برآمد کیا گیا۔ آئی ایس پی آر کا کہنا ہے کہ علاقے میں کسی بھی بھارتی پراکسی فتنۃ الہندوستان سے وابستہ دہشت گرد کو انجام تک پہنچانے کے لیے کلیئرنس آپریشنز جاری ہیں۔ ترجمان نے مزید کہا کہ سیکیورٹی فورسز اور قانون نافذ کرنے والے ادارے عزمِ استحکام کے تحت انسدادِ دہشت گردی مہم بھرپور انداز میں جاری رکھے ہوئے ہیں تاکہ ملک سے دہشت گردی کا مکمل خاتمہ کیا جا سکے۔ وزیراعظم شہباز شریف نے کامیاب کارروائیوں پر سیکیورٹی فورسز کو خراج تحسین پیش کرتے ہوئے کہا کہ دہشت گردی کے خلاف جنگ میں پوری قوم اپنی بہادر فورسز کے ساتھ کھڑی ہے ملک سے ہر قسم کی دہشت گردی کا خاتمہ ہمارا عزم ہے۔ وفاقی وزیر داخلہ محسن نقوی نے بھی فورسز کی پیشہ ورانہ صلاحیتوں اور بہادری کو سراہتے ہوئے کہا کہ بلوچستان میں بھارتی پراکسی فتنۃ الخوارج کے ناپاک عزائم کو خاک میں ملا دیا گیا سیکیورٹی فورسز نے دہشت گردوں کو جہنم واصل کر کے قوم کا سر فخر سے بلند کیا ہے۔