ڈیرہ اسماعیل خان میں سیکیورٹی فورسز کی مؤثر کارروائی کے دوران 7 خوارج ہلاک ہو گئے جبکہ دہشتگردوں کے ساتھ فائرنگ کے تبادلے میں پاک فوج کا بہادر جوان نائیک یاسر خان شہید ہو گیا۔ پاک فوج کے شعبہ تعلقات عامہ کے مطابق کارروائی خوارج کے ایک ٹھکانے پر کی گئی جہاں سیکیورٹی فورسز نے بروقت اور پیشہ ورانہ انداز میں آپریشن کرتے ہوئے دہشتگردوں کو ہلاک کیا۔ آئی ایس پی آر کا کہنا ہے کہ ہلاک خوارج کے قبضے سے اسلحہ اور گولہ بارود بھی برآمد کیا گیا ہے۔ آئی ایس پی آر کے مطابق شہید نائیک یاسر خان کا تعلق ضلع مردان سے تھا اور ان کی عمر 34 سال تھی۔ شہید نے مادرِ وطن کے دفاع میں جان کا نذرانہ پیش کیا۔ فوجی ترجمان نے مزید بتایا کہ ہلاک شدہ خوارج بھارتی سرپرستی میں دہشتگرد سرگرمیوں میں ملوث تھے۔ علاقے میں کلیئرنس اور سینیٹائزیشن آپریشن جاری ہے تاکہ کسی بھی ممکنہ خطرے کا مکمل خاتمہ کیا جا سکے۔