امریکا کی کولمبیا یونیورسٹی کے معروف پروفیسر جیفری سیکس نے ایران میں حالیہ فسادات کا ذمہ دار امریکا اور اسرائیل کو ٹھہراتے ہوئے کہا ہے کہ ایران میں ایک غیر معمولی، پُرتشدد اور سفاک کھیل جاری ہے۔ پروفیسر جیفری نے کہا کہ خریدا ہوا اور جانبدار امریکی میڈیا بتاتا ہے کہ ایرانی حکومت نے معیشت پر کنٹرول کھو دیا، مگر حقیقت یہ ہے کہ ایرانی معیشت کو تباہ کرنے والا امریکا خود ہے۔ انہوں نے مزید کہا کہ ہمیشہ کی طرح عوام سے جھوٹ بولا جاتا ہے کہ ایرانی حکومت اپنے عوام پر ظلم کر رہی ہے۔ ایرانی سپریم لیڈر نے مظاہروں کے دوران ہونے والی اموات اور نقصانات کے لیے براہ راست امریکی صدر کو ذمہ دار ٹھہرایا۔ پروفیسر جیفری کے مطابق امریکا اور اسرائیل کا اصل مقصد ایرانی عوام کی زندگی کو مزید بدتر بنانا اور ایران میں رجیم چینج کرنا ہے۔ بین الاقوامی امور کے ماہر سینیٹر مشاہد حسین سید نے پروفیسر کے بیان کو سراہتے ہوئے سوشل میڈیا پر شیئر کیا اور لکھا کہ مغربی میڈیا ایران کے بارے میں اتنا کمزور، جعلی اور خریدا ہوا ہے کہ وہ سچ بتانے سے انکار کر رہا ہے۔