سوشل میڈیا پر ایک پوسٹ وائرل ہونے کے بعد یہ دعویٰ کیا جا رہا تھا کہ عائشہ بلوچ نامی خاتون ریسلر نے ایشین گیمز (سری لنکا) میں پاکستان کے لیے گولڈ میڈل حاصل کیا ہے تاہم پاکستان ریسلنگ فیڈریشن نے اس خبر کی سختی سے تردید کر دی ہے۔ پاکستان ریسلنگ فیڈریشن کے مطابق عائشہ بلوچ نامی کسی خاتون ریسلر کو نہ تو کسی بین الاقوامی ایونٹ، ایشین گیمز یا کسی قومی و بین الاقوامی مقابلے کے لیے نامزد کیا گیا ہے اور نہ ہی وہ فیڈریشن کے زیر انتظام کسی ایونٹ میں شریک رہی ہیں۔ بیان میں مزید کہا گیا ہے کہ آئندہ ایشین گیمز ستمبر 2026 میں منعقد ہونا ہیں، لہٰذا سوشل میڈیا پر گردش کرنے والا یہ دعویٰ مکمل طور پر حقائق کے منافی اور گمراہ کن ہے۔ پاکستان ریسلنگ فیڈریشن نے عوام، میڈیا اور سوشل میڈیا صارفین سے اپیل کی ہے کہ غیر مصدقہ خبروں پر یقین نہ کریں اور ریسلنگ سے متعلق معلومات صرف سرکاری ذرائع سے حاصل کریں۔