پاکستان وہیل چیئر کرکٹ کونسل (PWCC) نے پاکستان کے سابق ٹیسٹ فاسٹ بولر عامر نذیر کو قومی سلیکشن کمیٹی کا نیا چیف سلیکٹر مقرر کرنے کا باقاعدہ اعلان کردیا ہے۔ وہیل چیئر کرکٹ کو مزید پیشہ ورانہ خطوط پر استوار کرنے اور ملک میں اس کھیل کے فروغ کے لیے 5 رکنی قومی سلیکشن کمیٹی تشکیل دے دی گئی ہے۔ عامر نذیر کی سربراہی میں قائم ہونے والی اس کمیٹی میں پاکستان وہیل چیئر کرکٹ ٹیم کے کپتان، ہیڈ کوچ، پی ڈبلیو سی سی کے ایگزیکٹو بورڈ ممبر اور پی سی بی کے کوالیفائیڈ کوچ و پروفیشنل فزیکل ٹرینر شامل ہیں۔ یہ کمیٹی کھیل کے امور اور کھلاڑیوں کی فٹنس کو مدنظر رکھتے ہوئے انتخابی عمل کو شفاف بنائے گی۔ نو منتخب چیف سلیکٹر عامر نذیر وہیل چیئر کرکٹ کے تینوں فارمیٹس یعنی ٹی ٹوئنٹی (T-20)، ون ڈے (ODI) اور حال ہی میں متعارف کروائے گئے تاریخی "تھری ڈے ٹیسٹ فارمیٹ" کے لیے کھلاڑیوں کے پولز اور کارکردگی کی نگرانی کریں گے۔ ان کی اولین ترجیحات میں صوبائی اور علاقائی سطح پر ٹیلنٹ ہنٹ پروگرامز کو نئے سرے سے منظم کرنا ہے تاکہ ملک کے کونے کونے سے نیا اور باصلاحیت ٹیلنٹ سامنے لایا جا سکے۔ سلیکشن کمیٹی کے سامنے سال 2026 اور 2027 کا ایک مصروف ترین شیڈول ہے، جس میں مکمل میرٹ کی بنیاد پر قومی اسکواڈز کا انتخاب کیا جائے گا۔ کمیٹی کے فوری اہداف میں تیسرا (3rd) ٹی ٹوئنٹی وہیل چیئر ایشیا کپ، پہلی (1st) وہیل چیئر ٹیسٹ سیریز، ورلڈ وہیل چیئر کرکٹ سیریز اور ڈومیسٹک سطح کا سب سے بڑا ایونٹ "پریزیڈنٹ کپ" شامل ہے، جس میں ملک بھر کی 8 علاقائی ٹیمیں شرکت کریں گی۔ چیف سلیکٹر عامر نذیر اور سلیکشن کمیٹی تمام علاقائی (Regional) اور قومی ٹیموں کے لیے بہترین کھلاڑیوں کے نام تجویز کرنے کی ذمہ دار ہوگی، جبکہ پاکستان وہیل چیئر کرکٹ کونسل (PWCC) کی چیئرپرسن کے پاس کمیٹی کی سفارشات اور حتمی اسکواڈز کی منظوری اور توثیق دینے کا حتمی اختیار ہوگا۔ پاکستان وہیل چیئر کرکٹ کونسل نے امید ظاہر کی ہے کہ سابق ٹیسٹ کرکٹر عامر نذیر کی آمد سے پاکستان میں وہیل چیئر کرکٹ کو نئی بلندیاں ملیں گی اور عالمی سطح پر پاکستان کا نام روشن ہوگا۔