صومالیہ میں جہاز پر قید پاکستانی عملے کی رہائی کے لیے حکومت پاکستان نے سفارتی سرگرمیاں تیز کر دی ہیں۔ وفاقی وزیر بحری امور جنید انوار چوہدری نے نائب وزیراعظم و وزیر خارجہ اسحاق ڈار سے ٹیلیفونک رابطہ کرکے معاملے کی حساسیت سے آگاہ کیا۔ وفاقی وزیر نے پاکستان میں تعینات صومالی سفیر سے بھی رابطہ کیا اور پاکستانی عملے کی جلد اور محفوظ رہائی کے لیے مؤثر اقدامات کرنے پر زور دیا۔ جنید انوار چوہدری کا کہنا تھا کہ اپریل میں واقعے کی اطلاع ملتے ہی انسانی ہمدردی کی بنیاد پر پاکستانی عملے کی رہائی کے لیے کوششیں شروع کر دی گئی تھیں اور متعلقہ ادارے مسلسل صورتحال کی نگرانی کر رہے ہیں۔ انہوں نے بتایا کہ وزارت بحری امور، وزارت خارجہ اور صومالی سفارت خانہ اس معاملے پر مسلسل رابطے میں ہیں تاکہ پاکستانی شہریوں کی بحفاظت واپسی کو یقینی بنایا جا سکے۔ وفاقی وزیر نے کہا کہ حکومت اپنے شہریوں کے تحفظ کو اولین ترجیح دیتی ہے اور پاکستانی عملے کی جلد از جلد رہائی کے لیے تمام ممکنہ سفارتی ذرائع استعمال کیے جا رہے ہیں۔