لامین یمال کی عمر صرف 17 سال ہے، لیکن ان کے لیے اصل کامیابی فٹبال کے میدان میں حاصل ہونے والی شہرت یا دولت نہیں بلکہ اپنے خاندان کی بدلی ہوئی زندگی ہے۔ اسپین اور ایف سی بارسلونا کے نوجوان اسٹار کا کہنا ہے کہ آج جب وہ اپنی والدہ، والد، دادی اور چھوٹے بھائی کو سکون اور عزت کے ساتھ زندگی گزارتے دیکھتے ہیں تو انہیں محسوس ہوتا ہے کہ ان کی تمام محنت رنگ لے آئی ہے۔
ایک حالیہ انٹرویو میں لامین یمال نے بتایا کہ ان کی دادی فاطمہ نے خاندان کے بہتر مستقبل کے لیے اکیلے مراکش چھوڑا اور اسپین کا رخ کیا۔ مختلف شہروں سے سفر کرتے ہوئے وہ کاتالونیا کے شہر ماتارو پہنچیں، جہاں انہوں نے مسلسل محنت کی تاکہ اپنے بچوں کو بھی اپنے پاس بلا سکیں۔ یمال کے مطابق انہی قربانیوں نے ان کے خاندان کے لیے نئی راہیں کھولیں۔
انہوں نے بتایا کہ ان کے والد بچپن میں اپنی بہن کے ساتھ مراکش میں رہ گئے تھے، لیکن دادی نے محنت مزدوری سے اتنی رقم جمع کر لی کہ انہیں بھی اسپین منتقل کروا سکیں۔ دوسری جانب ان کی والدہ بھی کم عمری میں استوائی گنی سے اسپین آئی تھیں۔ بعد میں دونوں کی ملاقات بارسلونا میں ہوئی، مگر مالی مشکلات نے کئی برس تک ان کی زندگی کو آسان نہیں ہونے دیا۔
لامین یمال نے اپنے بچپن کو یاد کرتے ہوئے کہا کہ انہوں نے ایسے رہائشی مرکز میں وقت گزارا جہاں کم آمدنی والے خاندانوں کو رہائش اور مشترکہ کھانے کی سہولت دی جاتی تھی۔ کچھ عرصہ ایسا بھی آیا جب ایک دوست نے ان کے خاندان کو اپنے گھر کا صرف ایک کمرہ رہنے کے لیے دیا۔ ان کے مطابق یہ حالات مشکل ضرور تھے، لیکن انہوں نے کبھی امید کا دامن نہیں چھوڑا۔
انہوں نے بتایا کہ والدین کی علیحدگی کے بعد وہ اپنی والدہ کے ساتھ دوسرے شہر منتقل ہوگئے، جبکہ ان کے والد اپنی والدہ کے ساتھ رہنے لگے۔ اس دور نے انہیں کم عمری میں ہی زندگی کی حقیقتوں سے روشناس کرایا اور آگے بڑھنے کا حوصلہ دیا۔
بارسلونا کے نوجوان اسٹار کا کہنا تھا کہ آج انہیں سب سے زیادہ خوشی اس بات کی ہے کہ ان کی والدہ کے پاس وہ سب کچھ ہے جس کی وہ کبھی خواہش کرتی تھیں، ان کے والد پرسکون زندگی گزار رہے ہیں، ان کی دادی اپنے گھر میں مطمئن ہیں اور ان کا چھوٹا بھائی وہ بےفکری والا بچپن گزار رہا ہے جو انہیں خود نصیب نہیں ہو سکا۔ ان کے بقول، کسی بھی بچے کے لیے اس سے بڑی کامیابی اور کوئی نہیں ہو سکتی۔
لامین یمال آج بھی اپنے آبائی علاقے روکافونڈا کو نہیں بھولے۔ ہر گول کے بعد ان کا مخصوص جشن اسی علاقے کے پوسٹل کوڈ کی نمائندگی کرتا ہے، جو ان کے لیے اپنی جڑوں، جدوجہد اور شناخت کی علامت ہے۔ رپورٹس کے مطابق کامیابی حاصل کرنے کے بعد انہوں نے اپنی دادی فاطمہ کے لیے روکافونڈا میں ایک گھر خریدا، جبکہ ان کے والد اب بارسلونا کے ایک بہتر رہائشی علاقے میں زندگی گزار رہے ہیں۔