لاہور (اسپورٹس ڈیسک) بنگلہ دیش کے دارالحکومت ڈھاکہ میں منعقدہ 10 ویں ساؤتھ ایشین کراٹے چیمپئن شپ میں پاکستان کی نمائندگی کرتے ہوئے واپڈا کے کھلاڑیوں نے شاندار کارکردگی کا مظاہرہ کرتے ہوئے مجموعی طور پر 6 میڈلز اپنے نام کر لیے ہیں۔ پانچ روز تک جاری رہنے والی اس چیمپئن شپ میں واپڈا کے میر حمزہ کاسی سب سے نمایاں کھلاڑی رہے، جنہوں نے انڈر 21 کیٹگری میں شاندار کھیل پیش کرتے ہوئے گولڈ میڈل جیتا۔ انہوں نے اسی ایونٹ کی سینئر 75 کلوگرام کیٹگری میں برونز (کانسی کا) میڈل بھی حاصل کیا۔ ان کے علاوہ میر ویس خان نے عمدہ کارکردگی کا مظاہرہ کرتے ہوئے 61 کلوگرام کیٹگری میں سلور (چاندی کا) میڈل اپنے نام کیا۔ مرد کھلاڑیوں کے ساتھ ساتھ واپڈا کی خواتین ایتھلیٹس نے بھی چیمپئن شپ میں بہترین کھیل پیش کیا۔ حافظہ اقرا منور نے 45 کلوگرام کیٹگری، رابعہ فاروق نے 50 کلوگرام کیٹگری اور لائبہ ضیاء نے 55 کلوگرام کیٹگری میں بالترتیب برونز میڈلز حاصل کیے۔ واپڈا اسپورٹس بورڈ کی جانب سے ساؤتھ ایشین کراٹے چیمپئن شپ میں ملک کا نام روشن کرنے اور شاندار کارکردگی کا مظاہرہ کرنے پر تمام فاتح کھلاڑیوں کو مبارکباد پیش کی گئی ہے اور ان کے لیے نیک خواہشات کا اظہار کیا گیا ہے۔