پاکستان ویمنز کرکٹ ٹیم کی بیٹر گُل فیروزہ نے میڈیا سے گفتگو کرتے ہوئے کہا ہے کہ ایشیا کپ اور ایشین گیمز کے لیے ٹیم کی تیاریاں بہترین انداز میں جاری ہیں اور وہ اپنی انفرادی کارکردگی سے بھی مطمئن ہیں۔ انہوں نے بتایا کہ ٹیم کا بنیادی ہدف ایشیا کپ میں شاندار شروعات کرنا ہے اور اس سلسلے میں کھلاڑی اپنی ماضی کی غلطیوں کو دور کرنے کے لیے سخت محنت کر رہی ہیں۔ نیٹ ٹریننگ کے مقابلے میں میچ سنیریو کو زیادہ مفید قرار دیتے ہوئے ان کا کہنا تھا کہ ایسے میچز سے کھلاڑیوں کو اپنی خامیاں پہچاننے اور انہیں سدھارنے کا بہترین موقع مل رہا ہے، جس سے امید ہے کہ تیاریوں کا مثبت نتیجہ برآمد ہوگا۔ گُل فیروزہ نے گزشتہ ورلڈ کپ کا ذکر کرتے ہوئے افسوس کا اظہار کیا کہ ٹیم توقعات کے مطابق نتائج نہیں دے سکی تھی، تاہم اب تمام کھلاڑی پُرعزم ہیں کہ ورلڈ کپ کی خامیاں آئندہ ایونٹس میں نہ دہرائی جائیں۔