ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان اور سعودی عرب کے درمیان مشترکہ دفاعی معاہدہ خطے میں استحکام کی ضمانت ہے اور اس کے تحت تمام اقدامات دفاعی نوعیت کے ہوں گے۔
امریکی نشریاتی ادارے سی این این کو انٹرویو میں انہوں نے کہا کہ پاکستان کی افواج کئی دہائیوں سے سعودی عرب میں مختلف شعبوں میں موجود ہیں۔ معاہدے کے تحت فوجی دستوں کی تعیناتی اور استعمال کا فیصلہ آپریشنل کمانڈرز کریں گے۔
ڈی جی آئی ایس پی آر کے مطابق کسی ایک ملک پر حملہ سب پر حملہ تصور ہوگا اور معاہدے کا مقصد سعودی عرب کا دفاع اور ممکنہ خطرات کو ناکام بنانا ہے۔
امریکا اور ایران کے تنازع پر انہوں نے کہا کہ پاکستان مذاکرات کے ذریعے پُرامن حل کے لیے کوششیں جاری رکھے گا۔ ان کے مطابق پاکستان نے جنگ بندی کے لیے غیر جانب دار ثالث کا کردار ادا کیا اور خطے میں امن و استحکام پاکستان کے مفاد میں ہے۔