چیمپئنز ٹرافی اسکواڈ میں آل راؤنڈر فہیم اشرف کی شمولیت پر جہاں شائقین کرکٹ سوال اٹھا رہے ہیں وہیں سابق قومی کپتان وسیم اکرم بھی حیران ہیں۔ پاکستان کے سابق کپتان سوئنگ کے سلطان وسیم اکرم نے آئی سی سی چیمپئنز ٹرافی کے اسکواڈ میں آل راؤنڈر فہیم اشرف کی شمولیت پر حیرانی کا اظہار کرتے ہوئے کہا ہے کہ یہ دونوں کیسے ٹیم میں آگئے؟ سمجھ سے باہر ہے۔وسیم اکرم نے آل راؤنڈر فہیم اشرف کی سلیکشن پر تشویش کا اظہار کرتے ہوئے انہیں ‘آؤٹ آف بلیو’ قرار دیا اور کہا کہ ابتدائی 20 میچز میں اسکی بالنگ اوسط 100 کی ہے اور بیٹنگ اوسط محض 9 کی، اب آگے کیا کہہ سکتے ہیں۔چیمپئینز ٹرافی اسکواڈ میں صرف ایک اسپنر کی شمولیت کو انہوں نے حیران کن قرار دیتے ہوئے کہا کہ جب ایونٹ میں شریک ٹیمیں برصغیر کی پچز کے باعث اسپنر کی تعداد بڑھا کر آ رہی ہیں لیکن ہم صرف ایک اسپیشلسٹ اسپنر کے ساتھ ٹورنامنٹ میں جا رہے ہیں۔ان کا کہنا تھا کہ میں چاہتا ہوں کہ پاکستان چیمپئنز ٹرافی میں اپنے اعزاز کا دفاع کرے، مگر اعلان کردہ اسکواڈ کے ساتھ یہ آسان نہ ہوگا۔وسیم اکرم کے علاوہ سابق کرکٹرز تنویر احمد، کامران اکمل اور باسط علی نے بھی آل راؤنڈر فہیم اشرف کے ساتھ خوشدل شاہ کی واپسی پر سوالیہ نشان اٹھایا اور ٹورنامنٹ میں ان کی جگہ سفیان مقیم اور بالنگ آل راؤنڈر کیلیے عامر جمال کے ناموں کے حمایت کی۔واضح رہے کہ فہیم اشرف نے اپنا آخری ون ڈے میچ روایتی حریف بھارت کیخلاف 11 ستمبر 2023 میں ایشیا کپ میں کھیلا تھا جہاں پاکستان کو بدترین شرکت کا منہ دیکھنا پڑا تھا جب کہ خوشدل شاہ نے پاکستان کی نمائندگی کرتے ہوئے اپنا آخری میچ 7 اکتوبر 2023 کو کھیلا تھا۔