"کھانے میں فرق اس لیے آتا ہے کیونکہ پانی جذبات رکھتا ہے، وہ سنتا ہے اور محسوس کرتا ہے! جاپانی سائنس دان نے ثابت کیا کہ پانی پر ہمارے الفاظ کا اثر ہوتا ہے، اگر ہم اچھے الفاظ کہیں تو پانی مثبت توانائی اختیار کر لیتا ہے، اور اگر برے الفاظ کہیں تو وہ منفی اثرات پیدا کرتا ہے۔ اسی لیے جو شخص جیسے جذبات کے ساتھ کھانا پکاتا ہے، اس کا ذائقہ بھی ویسا ہی ہوتا ہے!" یہ وہ الفاظ تھے جو اداکارہ و میزبان جویریہ سعود نے اپنے رمضان شو میں کہے اور جیسے ہی یہ ویڈیو وائرل ہوئی، سوشل میڈیا پر ایک نئی بحث چھڑ گئی۔ "پانی کے جذبات؟ سائنس یا محض ایک نظریہ؟" بات کچھ یوں ہوئی کہ رمضان شو میں اداکارہ ایمن خان نے ذکر کیا کہ ان کے شوہر منیب بٹ فوراً پہچان لیتے ہیں کہ کھانا کس نے پکایا ہے، چاہے وہ ان کی ملازمہ ہو یا وہ خود۔ اس پر جویریہ سعود نے دلچسپ دلیل دی کہ پانی ہماری باتوں کو محسوس کرتا ہے، اور وہی جذبات کھانے میں شامل ہو جاتے ہیں۔ جویریہ سعود نے مزید کہا کہ یہ محض ایک قیاس نہیں بلکہ جاپانی سائنس دان "ماسارو ایموٹو" کی تحقیق ہے، جس میں انہوں نے ثابت کیا کہ پانی انسانی جذبات کو سمجھتا ہے۔ اس تحقیق کے مطابق، اگر پانی کے سامنے مثبت باتیں کی جائیں تو اس کے مالیکیولز خوبصورت ترتیب میں نظر آتے ہیں، اور اگر منفی باتیں کی جائیں تو پانی کا ڈھانچہ بگڑ جاتا ہے۔ "ماں کے ہاتھ کے کھانے کا راز بھی یہی ہے؟" جویریہ سعود کی اس گفتگو کے دوران ایمن خان نے کہا، "شاید اسی لیے ماں کے ہاتھ کے کھانے جیسا ذائقہ کسی اور کے ہاتھ کے کھانے میں نہیں ہوتا!" اس پر میزبان نے مزید کہا کہ جب کوئی محبت، خلوص اور اچھی نیت کے ساتھ کھانا پکاتا ہے تو پانی اس مثبت توانائی کو جذب کر لیتا ہے اور یہی وجہ ہے کہ کچھ کھانوں میں ذائقہ جادوئی لگتا ہے! "سوشل میڈیا پر نئی بحث چھڑ گئی" یہ ویڈیو وائرل ہوتے ہی سوشل میڈیا صارفین کے درمیان دلچسپ تبصرے اور گرما گرم بحث شروع ہوگئی۔ کچھ لوگوں نے جویریہ سعود کے نظریے کی حمایت کی، جبکہ کچھ نے اسے "محض ایک افسانہ" قرار دیا۔ جہاں ایک طرف صارفین نے "پانی کے جذبات" کے نظریے کو دلچسپ قرار دیا، وہیں کچھ نے سوال اٹھایا کہ "کیا واقعی پانی باتیں سنتا ہے یا یہ صرف ایک قیاس آرائی ہے؟" "حقیقت یا محض ایک خیال؟" ماسارو ایموٹو کی تحقیق کو دنیا بھر میں متنازعہ سمجھا جاتا ہے کیونکہ کچھ سائنس دان اسے ثابت شدہ حقیقت نہیں مانتے۔ تاہم، جویریہ سعود کا ماننا ہے کہ انسان کے خیالات اور الفاظ کا اثر ہر چیز پر پڑتا ہے، حتیٰ کہ کھانے پر بھی