اداکارہ زیبا بختیار کے بیٹے اذان سمیع خان نے ان کی نئی تصاویر شیئر کی ہیں جس نے سب کو حیران کر دیا ہے۔اذان سمیع خان نے انسٹاگرام پر تصاویر شیئر کرتے ہوئے لکھا کہ ’میری خوبصورت اماں، ایک بھی ایسا دن نہیں گزرتا جس دن میں شکر نہ کروں کہ اللہ نے مجھے آپ کا بیٹا بنایا۔‘انہوں نے اس فوٹو شوٹ کی تمام ٹیم کا شکریہ ادا کیا اور مبارک باد دی۔انہوں نے فوٹو سیشن میں شریک افراد کے نام شیئر کرتے ہوئے یہ بھی لکھا کہ ’ان لوگوں کو خصوصی طور پر مبارک باد، جنہوں نے ان (زیبا بختیار) کو فوٹو شوٹ پر آمادہ کیا۔ سب کے لیے بہت زیادہ محبت۔‘اس پوسٹ پر سوشل میڈیا صارفین متوجہ ہوئے بغیر نہ رہ سکے اور اس پر کمنٹس کر رہے ہیں۔انسٹاگرام اکاؤنٹ فیئر سٹائل کے نام سے بنی آئی ڈی نے لکھا کہ ’او مائی گاڈ اس عمر میں بھی ان کی اتنی خوبصورتی، متاثرکن ہے، ماشااللہ۔‘ آئی ایم اے خان نے بھی کچھ ایسے ہی جذبات کا اظہار کیا اور لکھا کہ ’سدا بہار زیبا جی، آج بھی ٹاپ ہیروئنز سے زیادہ خوبصورت ہیں۔‘ناز نے موجودہ ہیروئنز کو مشورہ دیا کہ ’وہ زیبا بختیار سے انسپریشن لیں کہ کیسے ماڈلنگ کرنی چاہیے، سو ڈیسنٹ‘زیک نے گئے زمانے کو یاد کرتے ہوئے لکھا کہ ’آج بھی ان کا عدنان سمیع خان کے ساتھ کیا گیا البم یاد ہے، ذرا ڈھولکی بجاؤ گوریو۔‘اسی طرح ماہا ہما نے ان کی فلم کا حوالہ دیتے ہوئے لکھا کہ ’ان کو پہلی بار فلم حنا میں دیکھا تھا، وہ بہت خوبصورت اور معصوم چہرہ تھا جو اس عمر میں بھی شاندار ہے۔‘ارشد خان نے ان کی فلم کے گانے کے بول لکھے ’خوش رنگ حنا، گارجیئس‘1962 کو کوئٹہ میں پیدا ہونے والی زیبا بختیار معروف قانون دان اور سیاست دان یحییٰ بختیار کی بیٹی ہیں۔انہوں نے اپنے کیریئر کا آغاز 1988 میں پی ٹی وی کے ڈرامے ’انارکلی‘ سے کیا جس کے بعد انڈین فلمساز اور اداکار رندھیر کپور نے ان سے رابطہ کیا اور ان کو اپنی فلم میں ایک پاکستانی لڑکی کے کردار کی پیشکش کی جو انہوں نے قبول کی۔حنا فلم 1991 میں ریلیز ہوئی جس کے بعد انہوں نے بالی وڈ میں محبت کی آرزو، سٹنٹ مین، جے وکرانتا اور مقدمہ میں کام کیا۔اس کے بعد 1995 میں پاکستان لوٹیں اور سید نور کی فلم ’سرگم‘ میں گلوکار اور موسیقار عدنان سمیع خان کے ساتھ کام کیا اور اس دوران ہی دونوں رشتہ ازدواج میں بندھے تاہم چند برس بعد علیحدگی ہو گئی تھی۔اذان سمیع خان عدنان سمیع خان کے بیٹے ہیں اور وہ اپنی والدہ کے ساتھ رہتے ہیں۔