لاہور کی سیشن عدالت نے اداکارہ مومنہ اقبال کو ہراساں کرنے اور جان سے مارنے کی دھمکیاں دینے کے مقدمے میں رکن صوبائی اسمبلی ثاقب چدھڑ اور ان کی اہلیہ کی عبوری ضمانت میں 2 جولائی تک توسیع کردی۔
ایڈیشنل سیشن جج نے مقدمے کی سماعت کی، جس دوران ثاقب چدھڑ اور ان کی اہلیہ عدالت میں پیش ہوئے۔ سماعت کے دوران نیشنل سائبر کرائم انویسٹی گیشن ایجنسی (این سی سی آئی اے) کے تفتیشی افسر نے عدالت کو آگاہ کیا کہ ملزمان کے موبائل فون فرانزک تجزیے کے لیے بھجوائے جا چکے ہیں اور تفتیش مکمل کرنے کے لیے مزید وقت درکار ہے۔
عدالت نے دلائل سننے کے بعد دونوں ملزمان کی عبوری ضمانت میں 2 جولائی تک توسیع کرتے ہوئے این سی سی آئی اے کو آئندہ سماعت پر تفتیشی رپورٹ پیش کرنے کی ہدایت بھی جاری کردی۔
واضح رہے کہ این سی سی آئی اے نے اداکارہ مومنہ اقبال کی مدعیت میں ثاقب چدھڑ اور ان کی اہلیہ کے خلاف مقدمہ درج کر رکھا ہے۔