قذافی اسٹیڈیم، لاہور میں منگل کے روز کھیلے گئے سہ ملکی ون ڈے سیریز کے ایک میچ میں سری لنکا نے پاکستان کی امیدوں کو خاک میں ملا دیا، جس کے بعد انگلینڈ کی فائنل میں پہنچنے کی تمام امیدیں ختم ہوگئی ہیں۔
پاکستان کے محض 25.3 اوورز میں 110 رنز پر ڈھیر ہو جانے کے بعد سری لنکا نے 111 رنز کا ہدف 119 گیندیں باقی رہتے ہوئے آسانی کے ساتھ 2 وکٹوں کے نقصان پر 114 رنز بنا کر حاصل کرلیا۔
@@3947038@@
سہ ملکی سیریز کے اپنے پچھلے میچ میں انگلینڈ کے خلاف 430 رنز کا ناممکن ہدف حاصل کرنے والی سری لنکن ٹیم اب ایک بار پھر انگلینڈ کے مدِ مقابل ہوگی، تاہم اس میچ کا فائنل پر کوئی اثر نہیں پڑے گا۔
بائیں ہاتھ کے تیز گیند باز دلشان مدوشنکا سری لنکا کی جانب سے نمایاں کھلاڑی رہے، جنہوں نے 8.3 اوورز میں 34 رنز دے کر 5 وکٹیں حاصل کیں، جبکہ سہان آرچگے نے دو وکٹیں حاصل کیں۔ پاکستانی بلے باز بولرز کے لیے سازگار اس پچ پر شدید مشکلات کا شکار رہے۔
اس سے قبل انگلینڈ کے خلاف اپنے گزشتہ میچ میں بھی پاکستان کی بیٹنگ ناکام رہی تھی، جہاں 242 رنز کے ہدف کے تعاقب میں ٹیم 155 رنز پر 9 وکٹیں گنوا بیٹھی تھی، تاہم شاداب خان نے میچ جتوا دینے والی سنچری بنائی اور حارث رؤف کے ساتھ آخری وکٹ کے لیے 89 رنز کی شراکت قائم کر کے ٹیم کو ایک ناقابلِ یقین فتح دلائی تھی۔
تاہم شاداب منگل کے روز ناکام رہے اور آرچگے کا شکار بننے سے پہلے صرف 2 رنز بناسکے، جبکہ پلئنگ الیون میں صائم ایوب کی جگہ شامل کیے گئے معاذ صداقت بھی محض 8 رنز بنا کر آؤٹ ہوگئے۔
سری لنکا کی جانب سے پہلے فیلڈنگ کے فیصلے کے بعد، اوپنر فخر زمان کی خراب فارم کا سلسلہ جاری رہا اور وہ مدوشنکا کی گیند پر 5 رنز بنا کر پویلین لوٹ گئے۔
مدوشنکا نے اپنی رفتار اور سوئنگ سے تمام پاکستانی بلے بازوں کو پریشان کیا۔ ہوم ٹیم جو اپنے پہلے تینوں میچ جیت کر فائنل کے لیے کوالیفائی کرچکی ہے، پاور پلے میں 46 رنز پر 3 وکٹیں گنوا بیٹھی، اور اس کے بعد سينئر بلے بازوں سلمان علی آغا اور بابر اعظم کو ایک ہی مجموعی اسکور (61 رنز) پر کھو دیا، جبکہ تین رنز کے بعد شاداب بھی آؤٹ ہوگئے۔
پاکستان کی جانب سے بابر اعظم 33 گیندوں پر 29 رنز بنا کر ٹاپ اسکورر رہے، جبکہ کپتان شاہین شاہ آفریدی نے 15 اور حسن نواز نے 17 رنز بنائے۔
سری لنکا کی جانب سے اوپنر کامندو مینڈس 60 گیندوں پر 62 رنز بنا کر ناٹ آؤٹ رہے، جس میں دو چھکے اور آٹھ چوکے شامل تھے، اور انہوں نے پوان رتھنائیکے (23 رنز ناٹ آؤٹ) کے ساتھ شاندار شراکت قائم کی۔
مہمان ٹیم نے مطلوبہ ہدف 18.1 اوورز میں ہی حاصل کرلیا۔