عالمی منڈی میں بدھ کو خام تیل کی قیمتوں میں اضافہ ریکارڈ کیا گیا جس کی بڑی وجہ سعودی عرب کی آئل ریفائنری پر حملے کے بعد مشرقِ وسطیٰ سے تیل کی سپلائی متاثر ہونے کے خدشات ہیں۔ رپورٹ کے مطابق برینٹ خام تیل کی قیمت 1.48 ڈالر اضافے کے بعد 115.36 ڈالر فی بیرل ہوگئی جبکہ امریکی خام تیل ڈبلیو ٹی آئی 1.22 ڈالر مہنگا ہوکر 101.12 ڈالر فی بیرل پر پہنچ گیا۔ یہ قیمتیں بدھ کو گرینچ معیاری وقت کے مطابق رات 1 بج کر 40 منٹ پر ریکارڈ کی گئیں۔ یمن کے حوثیوں نے منگل کو دعویٰ کیا تھا کہ انہوں نے میزائل کے ذریعے سعودی عرب کی سب سے بڑی آئل ریفائنری کو نشانہ بنایا، تاہم سعودی حکام نے فوری طور پر حملے کی تصدیق نہیں کی۔ ایران اور اس کے اتحادی گروہوں کے ساتھ جاری تنازع کے باعث خطے میں توانائی کی ترسیل سے متعلق غیر یقینی صورتحال بڑھ گئی ہے۔ دوسری جانب امریکا میں خام تیل کے ذخائر میں معمولی اضافے کی توقع ہے جبکہ اوپیک پلس سے دسمبر کے لیے تیل کی پیداوار کے اہداف برقرار رکھنے کی توقع کی جا رہی ہے۔ ادھر روسی بندرگاہوں سے خام تیل کی برآمدات میں ممکنہ کمی بھی عالمی منڈی میں قیمتوں پر اثرانداز ہوسکتی ہے۔