پاکستان میں امریکہ کے سفارت خانے اور یورپی یونین کی سفیر نے بلوچستان میں ٹرین پر حملے اور مسافروں کو یرغمال بنانے کے واقعے کی مذمت کی ہے۔بدھ کو پاکستان میں امریکی سفارت خانے کی جانب سے ایکس پر کی گئی پوسٹ میں کہا گیا ہے کہ ہم جعفر ایکسپریس ٹرین پر حملے اور مسافروں کو یرغمال بنانے کے عمل کی شدید الفاظ میں مذمت کرتے ہیں۔بیان کے مطابق اس کی ذمہ داری بلوچ لبریشن آرمی (بی ایل اے) نے قبل کی ہے جس کو امریکہ نے عالمی دہشت گرد قرار دیا ہے۔’ہم متاثرہ خاندانوں سے گہری ہمدردی اور تعزیت کا اظہار کرتے ہیں۔‘بیان میں مزید کہا گیا ہے کہ ’پاکستان کے عوام خوف اور تشدد سے آزاد زندگی گزارنے کا حق ہے، امریکہ پاکستان کا مضبوط شراکت دار ہے اور ہم اس مشکل وقت میں اس کے ساتھ کھڑے ہیں۔‘’یرغمالیوں کو فوری طور پر رہا کیا جائے‘پاکستان میں یورپی یونین کی سفیر رینا کویونکا ایکس پر پوسٹ کرتے ہوئے لکھا کہ ’ہم بلوچستان میں ہونے والے دہشت گرد حملے کی مذمت کرتے ہیں اور متاثرین کے ساتھ تعزیت اور ہمدردی کا اظہار کرتے ہیں۔‘انہوں نے مزید لکھا کہ ’ہمیں یرغمالیوں کے حوالے سے گہری تشویش ہے اور ان کی فوری رہائی کا مطالبہ کرتے ہیں۔‘پاکستان کی حمایت جاری رکھیں گے: چینچین نے بھی پاکستان کے صوبہ بلوچستان میں جعفر ایکسپریس پر عسکریت پسندوں کے حملے کی ’شدید مذمت‘ کی ہے۔پاکستان کی سرکاری خبر رساں ایجنسی اے پی پی کے مطابق چینی وزارت خارجہ کی ترجمان ماؤ ننگ نے بدھ کو معمول کی بریفنگ کے دوران دہشت گردی سے نمٹنے، یکجہتی اور سماجی استحکام کو برقرار رکھنے اور شہریوں کے تحفظ کے لیے پاکستان کی بھرپور حمایت جاری رکھنے کے عزم کا اظہار کیا۔ماؤ ننگ نے ٹرین پر حملے کے حوالے سے سوال کے جواب میں کہا کہ ’ہم نے رپورٹس کو نوٹ کیا اور اس دہشت گردحملے کی شدید مذمت کی۔‘