ایپل کے اولین اسمارٹ گلاسز 2026 میں متعارف کرائے جائیں گے۔ بلومبرگ کی ایک رپورٹ کے مطابق فیچرز کے لحاظ سے تو یہ اسمارٹ گلاسز میٹا کے رے بین گلاسز سے کافی ملتے جلتے ہوں گے مگر ایپل برانڈ انہیں دیگر سے منفرد بنائے گا۔ رپورٹ میں بتایا گیا کہ ایپل کے اسمارٹ گلاسز کو 2026 کے اختتام تک متعارف کرائے جانے کا امکان ہے۔رپورٹ کے مطابق یہ گلاسز کیمروں، مائیکرو فونز، اسپیکر اور ملٹی ماڈل آرٹی فیشل انٹیلی جنس (اے آئی) سے لیس ہوں گے۔درحقیقت یہ اسمارٹ گلاسز اے آئی ٹیکنالوجی کی مدد سے اردگرد کے ماحول کو دیکھ کر اس کا تجزیہ کرسکیں گے۔رپورٹ میں بتایا گیا کہ یہ اسمارٹ گلاسز ایپل کے وی آر ہیڈ سیٹ ویژن پرو سے مختلف ہوں گے۔اسمارٹ گلاسز کے باعث کمپنی نے ایپل واچ ڈیوائسز میں کیمرے کو شامل کرنے کا منصوبہ بھی ختم کر دیا ہے۔یہ اسمارٹ گلاسز استعمال کرکے صارفین ایسے متعدد کام کرسکیں گے جو ابھی اسمارٹ فونز سے ممکن ہیں جیسے میوزک پلے بیک کنٹرول اور ایپل کے ڈیجیٹل اسسٹنٹ Siri سے سوالات پوچھنا وغیرہ۔رپورٹ میں بتایا گیا کہ اسمارٹ گلاسز کے پروٹوٹائپ ماڈلز رواں سال کے آخر تک تیار کیے جاسکتے ہیں۔اولین اسمارٹ گلاسز بنیادی طور پر ایپل کی جانب سے اگیومینٹڈ رئیلٹی (اے آر) گلاسز کی تیاری میں پیشرفت کرنا ہے۔ایپل اے آر گلاسز کو آئی فونز کے متبادل کے طور پر تیار کرنا چاہتی ہے مگر ان کی تیاری کب تک ممکن ہوگی ابھی یہ کہنا مشکل ہے۔ایپل کے سی ای او ٹم کک نے 2022 میں ایک بیان میں اے آر ٹیکنالوجی کے حوالے سے اپنے جوش و خروش کا اظہار کیا تھا۔اس موقع پر انہوں نے کہا کہ ٹیکنالوجی انڈسٹری اس نئی ٹیکنالوجی کے حوالے سے ابھی ابتدائی مراحل سے گزر رہی ہے اور ہمیں اس میں بہت زیادہ مواقع نظر آرہے ہیں۔ان کا کہنا تھا کہ آپ انتظار کریں اور دیکھیں ہم اس حوالے سے آپ کو کیا پیش کرتے ہیں۔