چیئرمین پیپلز پارٹی بلاول بھٹو زرداری نے کہا ہے کہ کارکنان خیبرپختونخوا کی کرپٹ حکومت کا سامنا کرنے کو تیار ہیں۔ چیئرمین پیپلز پارٹی بلاول بھٹو نے پشاور میں صوبہ بچاؤ ریلی پر شیلنگ کی مذمت کرتے ہوئے کہا کہ خیبرپختونخوا حکومت نے پرامن احتجاج کا راستہ روک کر کرپشن چھپانے کی ناکام کوشش کی ہے۔ انہوں نے کہا کہ سیاسی کارکنوں پر آنسو گیس کی شیلنگ قابل افسوس ہے۔ لیکن ہم اوچھے ہتھکنڈوں سے ڈرنے والے نہیں ہیں۔ خیبرپختونخوا کی کرپٹ اور نااہل حکومت کا تعاقب جاری رکھیں گے۔بلاول بھٹو زرداری نے کہا کہ پاکستان تحریک انصاف (پی ٹی آئی) حکومت نے نہتے سیاسی کارکنوں پر تشدد کر کے بزدلی کا ثبوت دیا ہے۔ اور خیبرپختونخوا میں صوبہ بچاؤ تحریک آج ہر شہری کی آواز بن چکی ہے۔انہوں نے کہا کہ ہم لاٹھیوں اور ڈنڈوں سے ڈرنے والے نہیں ہیں۔ اور ہمارے کارکنان خیبرپختونخوا کی کرپٹ حکومت کا سامنا کرنے کو تیار ہیں۔ پی ٹی آئی کی حکومت کا اصل فاشسٹ چہرہ خیبرپختونخوا کی عوام نے دیکھ لیا۔