میگا بجٹ رومانٹک کامیڈی فلم ’لو گُرُو‘ اور ہارر کامیڈی فلم ’دیمک‘ کو پاکستان سمیت دنیا بھر میں ریلیز کردیا گیا۔ ہمایوں سعید اور ماہرہ خان نے ’لو گُرُو‘ کے ذریعے تین سال بعد بڑے پردے پر واپسی کی ہے جب کہ ’دیمک‘ کے ذریعے فیصل قریشی اور ثمینہ پیرزادہ جیسے اداکار بھی طویل عرصے بعد بڑے پردے پر دکھائی دے رہے ہیں۔’لو گُرو‘ گزشتہ تین سال میں ریلیز ہونے والی پہلی میگا بجٹ اور میگا کاسٹ فلم ہے، اس سے قبل آخری بار ’دی لیجنڈ آف مولا جٹ‘ ریلیز ہوئی تھی۔گزشتہ تین سال کے دوران پاکستان میں چھوٹے بجٹ اور چھوٹی کاسٹ پر مبنی فلمیں ریلیز ہوتی رہیں، اس بار ’لو گرو‘ کے علاوہ ’دیمک‘ جیسی میگا کاسٹ فلم بھی سینماؤں کی زینت بنی ہے۔’دیمک‘ میں فیصل قریشی کے علاوہ ثمینہ پیرزادہ، جاوید شیخ اور سونیا حسین بھی شامل ہیں، اس کی ہدایات رافع راشدی نے دی ہے۔’لو گُرُو‘ میں بھی جاوید شیخ، احمد علی بٹ اور دیگر اداکار بھی شامل ہیں، اس کی ہدایات ندیم بیگ نے دی ہیں جب کہ اس کی کہانی واسع چوہدری نے لکھی ہے۔ دونوں فلموں کا باکس آفس پر مقابلہ ہوگا، تاہم شائقین اور فلمی مبصرین کے اندازوں کے مطابق ’لو گُرُو‘ کمائی میں ’دیمک‘ کو پیچھے چھوڑ دے گی اور ہمایوں سعید و ماہرہ خان کی فلم کمائی کے نئے ریکارڈ بنائے گی۔دونوں فلموں کا پریمیئر رواں ہفتے کراچی میں ہوا تھا، پہلے دیمک کا پریمیئر ہوا تھا جب کہ 5 جون کی شب کو ’لو گرو‘ کا پریمیئر منعقد کیا گیا۔ہمایوں سعید نے ’لو گُرُو‘ کی پروموشن کے دوران بتایا تھا کہ مذکورہ فلم ان کی مہنگی ترین فلم ہے، جس میں 25 کروڑ روپے سے بھی زائد کا بجٹ لگا اور انہیں پوری امید ہے کہ فلم 100 کروڑ روپے سے زائد کی کمائی کرے گی۔پروموشن کی ایک تقریب کے دوران ماہرہ خان نے بھی فلم کی کمائی 100 کروڑ روپے تک جانے کی اجتماعی دعا بھی کرائی تھی، جس کی ویڈیو سوشل میڈیا پر وائرل ہوگئی تھی۔