پاکستان میں تعینات ایرانی سفیر رضاامیری مقدم نے کہا ہے کہ جب صہیونی حکومت اپنا دفاع نہیں کر پائی تو امریکا کو میدان میں لایا گیا، ہم اپنا بھرپور دفاع کریں گے۔ ایرانی سفیر رضا امیری مقدم نے اسلام آباد میں پریس کانفرنس کرتے ہوئے کہا کہ دو مرتبہ امریکا کی اٹھارہ انٹیلی جنس ایجنسیز نے ایران کے ایٹمی پروگرام کے پرامن ہونے کی تصدیق کی۔ سپریم لیڈر نے بھی واضح کیا تھا کہ ایٹمی پروگرام پرامن ہے، انہوں نے کہا کہ ہم فلسطین اور غزہ کے حوالے سے سخت موقف کے ساتھ کھڑے ہیں۔ اسی وجہ سے حملہ کیا گیا۔ایرانی سفیر نے کہا کہ اسرائیل نام کی کوئی ریاست نہیں بلکہ ناجائز حکومت ہے۔ انہوں نے مسلم ممالک پر اعتماد کا اظہار کرتے ہوئے کہا کہ ہمیں مسلمانوں کی مدد حاصل ہے، اس پر اطمینان ہے۔پاکستان کی حکومت ، صدر، وزیراعظم اور وزیر دفاع نے اسرائیلی جارحیت کی مذمت کی۔رضا امیری مقدم کا مزید کہنا تھا کہ امریکا کی ایران میں رجیم چینج کی خواہش پوری نہیں ہو گی۔جو ایران پر حکومت کرنے کی خواہش میں اسرائیل کے سائے میں چھپا بیٹھا ہے وہیں رہے۔