ایران اسرائیل جنگ کے دوران طویل عرصے تک انڈر گراؤنڈ رہنے کے بعد ایرانی سپریم لیڈر آیت اللہ خامنہ ای منظرعام پر آگئے ہیں۔ انہوں نے ہفتے کی رات تہران کی امام خمینی مسجد میں عاشورہ کی مناسبت سے منعقدہ تقریب میں شرکت کی، جو اسرائیل اور ایران کے درمیان 12 روزہ جنگ کے بعد ان کی پہلی عوامی شرکت تھی۔ ایرانی سرکاری میڈیا نے ان کی وڈیو نشر کی، جس میں انہیں مسجد میں داخل ہوتے ہوئے دکھایا گیا۔ حاضرین نے کھڑے ہوکر ان کا استقبال کیا جبکہ خامنہ ای نے ہاتھ ہلا کر اور سر ہلا کر ان کے نعروں کا جواب دیا۔ اسرائیل سے جنگ کے آغاز (13 جون) کے بعد وہ عوامی منظرنامے سے غائب تھے اور ان کے تمام بیانات پہلے سے ریکارڈ شدہ نشر کیے جا رہے تھے.