لاہور کے علاقے جوہر ٹاؤن میں ایک معمول کی ٹریفک چیکنگ نے اس وقت توجہ حاصل کر لی جب وزیراعلیٰ پنجاب مریم نواز کے بیٹے جنید صفدر کی سکیورٹی گاڑی کو روک کر اس پر کالے شیشوں کی خلاف ورزی پر چالان کر دیا گیا۔ ذرائع کے مطابق، ٹریفک پولیس اہلکار نے قوانین کے تحت کارروائی کرتے ہوئے گاڑی کو روکا اور بغیر کسی دباؤ کے قانون پر عملدرآمد کیا۔ گاڑی پر غیرقانونی سن شیڈز نصب تھے، جو ٹریفک ضوابط کی صریح خلاف ورزی ہے۔ دلچسپ طور پر، وزیراعلیٰ مریم نواز نے اس موقع پر غیر جانب داری کا مظاہرہ کرتے ہوئے اپنے بیٹے کی گاڑی کو چالان کرنے والی پولیس ٹیم کی نہ صرف تعریف کی بلکہ انہیں شاباش بھی دی۔ انہوں نے ٹیم کے انچارج شاہ زیب اور دیگر اہلکاروں, پرویز، حیدر اور مجاہد کو قانون کی پابندی یقینی بنانے پر سراہا۔ مریم نواز کا کہنا تھا کہ ان کی حکومت کی بنیاد قانون کی یکساں عملداری پر ہے اور وہ چاہتی ہیں کہ پنجاب بھر میں ضابطوں کا اطلاق کسی تفریق کے بغیر ہو۔ ان کے مطابق، قانون سب کے لیے برابر ہے اور یہی اصولی مؤقف ان کے طرزِ حکمرانی کی شناخت ہونا چاہیے۔ جبکہ جنید صفدر نے خود بھی انسٹاگرام اکاؤنٹ پر اسٹوری شیئر کی اور قانون کے مطابق کارروائی کرنے پر پنجاب کی ٹریفک پولیس کو سراہتے ہوئے لکھا کہ“'پنجاب پولیس کے وہ تمام اہلکار جنہوں نے کل میری گاڑی روکی اور چالان کیا، مجھے ان کے پیشہ ورانہ رویے نے بہت متاثر کیا، اللہ آپ لوگوں کی آن ڈیوٹی اور آف ڈیوٹی حفاظت فرمائے “