16 جولائی 2025 کو سیکیورٹی فورسز نے خفیہ اطلاعات کی بنیاد پر بلوچستان کے ضلع آواران میں ایک اہم کارروائی کی۔ اطلاعات کے مطابق یہ آپریشن بھارت کے حمایت یافتہ گروہ ’’فتنہ الہندستان‘‘ سے تعلق رکھنے والے دہشت گردوں کی موجودگی پر کیا گیا۔ کارروائی کے دوران سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا، جس کے نتیجے میں تین بھارتی سرپرستی میں کام کرنے والے دہشت گرد واصل جہنم ہوئے۔ یہ دہشت گرد پاکستان میں بدامنی پھیلانے کی ناپاک سازشوں میں ملوث تھے۔ آپریشن کے دوران شدید فائرنگ کا تبادلہ ہوا جس میں پاکستان آرمی کے بہادر افسر، میجر سید رب نواز طارق نے دشمن کا دلیری سے مقابلہ کرتے ہوئے جام شہادت نوش کیا۔ شہید کی عمر 34 سال تھی اور وہ ضلع مظفرآباد سے تعلق رکھتے تھے۔ وہ اپنے جوانوں کی قیادت خود محاذ پر موجود رہ کر کر رہے تھے اور انہوں نے دشمن کے سامنے بہادری سے لڑتے ہوئے اپنی جان وطن پر قربان کی۔ سیکیورٹی فورسز نے علاقے میں کلیئرنس آپریشن شروع کر دیا ہے تاکہ کسی بھی چھپے ہوئے دہشت گرد کو انجام تک پہنچایا جا سکے۔ پاک فوج کی جانب سے واضح کیا گیا ہے کہ بھارت کی سرپرستی میں ہونے والی دہشت گردی کے خاتمے تک کارروائیاں جاری رہیں گی اور ہمارے شہداء کی قربانیاں ہمیں مزید پُرعزم بناتی ہیں۔ پاکستانی قوم اپنے بہادر سپوتوں کی قربانیوں کو ہمیشہ یاد رکھے گی اور دشمن کے ناپاک عزائم کو ہر صورت ناکام بنایا جائے گا۔