نیشنل ڈیزاسٹر مینجمنٹ اتھارٹی (این ڈی ایم اے) نے ایک ہنگامی الرٹ میں خبردار کیا ہے کہ شاہراہِ قراقرم اور بابوسر ٹاپ دونوں اطراف سے لینڈ سلائیڈنگ کے باعث مکمل طور پر بند ہو چکے ہیں۔این ڈی ایم اے کے مطابق پہاڑی علاقوں میں جاری بارشوں اور لینڈ سلائیڈنگ کے خطرے کے پیش نظر سیاحوں اور مسافروں کو ان علاقوں کا سفر کرنے سے گریز کرنا چاہیے۔اتھارٹی نے شہریوں کو مشورہ دیا ہے کہ ’سڑکوں کی صورت حال اور بندش سے متعلق تازہ ترین معلومات حاصل کرنے کے لیے مقامی ریڈیو سٹیشنز یا سوشل میڈیا چینلز کا مسلسل جائزہ لیتے رہیں۔‘این ڈی ایم اے نے خاص طور پر خبردار کیا ہے کہ اگر مرکزی شاہراہیں بند ہوں تو لوگ کسی بھی غیر مصدقہ یا غیر معروف متبادل راستے سے سفر نہ کریں کیونکہ ایسے راستے انتہائی خطرناک ثابت ہو سکتے ہیں۔دریائے جہلم اور چناب میں سیلاب کا خدشہ، راولپنڈی اور گجرانوالہ ڈویژن میں اربن فلڈنگ کا الرٹ جاریپی ڈی ایم اے پنجاب نے کہا ہے کہ دریائے جہلم اور چناب  میں نچلے سے درمیانے درجے کے سیلاب کا الرٹ جاری کیا ہے جبکہ راولپنڈی اور گجرانوالہ ڈویژن میں اربن فلڈنگ کا خدشہ ہے۔منگل کو ترجمان پی ڈی ایم اے نے ایک بیان میں کہا کہ 22 سے 23 جولائی کے دوران دریائے چناب اور جہلم اور ان سے ملحقہ ندی نالوں میں نچلے سے درمیانے درجے کے سیلاب کا خدشہ ہے۔ڈی جی پی ڈی ایم اے عرفان علی کاٹھیا نے متعلقہ اضلاع کے کمشنرز و ڈپٹی کمشنرز کو الرٹ رہنے کی ہدایات کی ہے۔ڈی جی پی ڈی ایم اے کے مطابق راولپنڈی، گجرانوالہ، سرگودھا، فیصل آباد، ملتان اور ڈیرہ غازی خان ڈویژن کے کمشنرز کو الرٹ جاری کر دیا ہے۔ان ڈویژنز کے شہروں راولپنڈی، اٹک، چکوال، مری، جہلم، گجرانوالہ، سیالکوٹ، گجرات، منڈی بہاوالدین، وزیر آباد، سرگودھا، نارووال، جھنگ، کوٹ ادو اور دیگر متعلقہ اضلاع کے ڈپٹی کمشنرز کو الرٹ جاری کیا گیا ہے۔پی ڈی ایم اے پنجاب نے سول ڈیفنس، ریسکیو و متعلقہ اداروں کو پیشگی انتظامات مکمل کرنے کی ہدایت کی ہے۔ لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو سٹاک اور محکمہ ٹرانسپورٹ کو الرٹ جاری کر دیا گیا ہے۔ڈی جی پی ڈی ایم اے نے کہا تمام محکمے وزیر اعلیٰ پنجاب کی ہدایات کے پیش نظر تمام تر انتظامات پیشگی مکمل کریں۔ ایمرجنسی کنٹرول رومز میں سٹاف کو الرٹ رکھا جائے۔ ریسکیو 1122 کی ڈیزاسٹر رسپانس ٹیموں کو بھی ہائی الرٹ رکھا جائے۔انہوں نے کہا کہ ریسکیو آپریشن کے لیے پٹرول و ڈیزل کا سٹاک وافر مقدار میں ہونا چاہیے۔ عوام الناس کو موجودہ صورتحال سے لمحہ بہ لمحہ آگاہ رکھا جائے۔عرفان کاٹھیا کا کہنا تھا کہ دریاؤں کے پاٹ میں موجود مکانوں اور مویشیوں کے انخلاء کو یقینی بنائیں۔ فلڈ ریلیف کیمپس میں خوراک، پینے کے صاف پانی و دیگر سہولیات کی فراہمی کو یقینی بنایا جائے۔انہوں نے لوگوں سے اپیل کی کہ عوام جاری کردہ احتیاطی تدابیر پر عمل کریں۔ ہنگامی انخلاء کی صورت میں انتظامیہ سے تعاون کریں۔محکمۂ موسمیات نے کہا ہے کہ بارشوں کا نیا سلسلہ 25 جولائی تک جاری رہنے کا امکان ہے (فوٹو: اے ایف پی)گلگت بلتستان اور پاکستان کے زیرِ انتظام کشمیر میں ممکنہ بارشوں کے باعث لینڈ سلائیڈنگ الرٹ جاریدوسری جانب قدرتی آفات سے نمٹنے کے قومی ادارے این ڈی ایم اے کے نیشنل ایمرجنسی آپریشن سینٹر نے گلگت بلتستان اور پاکستان کے زیرِ انتظام کشمیر میں ممکنہ بارشوں کے باعث لینڈ سلائیڈنگ الرٹ جاری کر دیا ہے۔گلگت بلتستان میں گلگت، سکردو، ہنزہ، استور، دیامراور گھانچے کے حساس علاقوں میں لینڈ سلائیڈنگ متوقع ہے۔پاکستان کے زیرِ انتظام کشمیر میں مظفرآباد، وادی نیلم، ہویلی، باغ اور پونچھ میں بارشوں کے باعث لینڈ سلائیڈنگ کا خدشہ ہے۔بالائی خیبر پختونخوا کے اضلاع چترال، دیر، کوہستان اور ملحقہ پہاڑی علاقوں میں شدید بارشوں کے پیش نظر لینڈ سلائیڈنگ کا امکان ہے۔موسلادھار بارشوں سے سیلاب کا خدشہمحکمۂ موسمیات نے کہا ہے کہ ملک کے مختلف علاقوں میں مزید سیلاب آنے کا خدشہ ہے کیونکہ بارشوں کا نیا سلسلہ 25 جولائی تک جاری رہنے کا امکان ہے۔ملک بھر میں حالیہ مون سون کی بارشوں کے باعث مجموعی طور پر 221 افراد ہلاک اور 592 زخمی ہوئے۔