اطالوی سیاسی جماعت فائیو اسٹار موومنٹ کے اراکینِ پارلیمنٹ نے فلسطینی عوام سے یکجہتی کے اظہار کے لیے ایک منفرد انداز اپنایا ہے۔ انہوں نے پارلیمنٹ کے اجلاس میں فلسطینی پرچم کے رنگوں والے لباس پہن کر نہ صرف فلسطینیوں سے ہمدردی کا اظہار کیا بلکہ اسرائیلی حملوں کے خلاف اپنا احتجاج بھی ریکارڈ کرایا۔ پارٹی اراکین نے پارلیمنٹ میں کہا کہ آج ہم یہ پرچم نہیں لہرا رہے کیونکہ آپ ہم سے چھین لیں گے۔ انہوں نے مزید کہا کہ آج ہم اس پرچم کو اپنے جسم سے لگا رہے ہیں کیونکہ یہ اب صرف فلسطین کا پرچم نہیں رہا بلکہ یہ انسانیت کے لیے جدوجہد کرنے والوں کا عالمی پرچم بن چکا ہے۔ اطالوی ارکانِ پارلیمنٹ کا یہ اقدام فلسطینی عوام کے ساتھ بین الاقوامی یکجہتی کی ایک اہم مثال ہے۔