بلوچستان کے ضلع ژوب میں پاک افغان سرحد کے قریب سکیورٹی فورسز نے کلیئرنس آپریشن کے دوران مزید 14 بھارتی حمایت یافتہ خوارج کو ہلاک کر دیا جس کے بعد دو روزہ کارروائیوں میں ہلاک دہشت گردوں کی مجموعی تعداد 47 ہو گئی ہے۔ پاک فوج کے شعبہ تعلقات عامہ (آئی ایس پی آر) کے مطابق 8 اور 9 اگست کی درمیانی شب ضلع ژوب کے علاقے سمبازہ اور گردونواح میں منصوبہ بندی کے تحت کلیئرنس آپریشن کیا گیا۔ آپریشن کے دوران ہلاک ہونے والے دہشت گردوں کے قبضے سے بھاری مقدار میں اسلحہ، گولہ بارود اور دھماکا خیز مواد برآمد ہوا۔ آئی ایس پی آر کا کہنا ہے کہ اس سے قبل 7 اور 8 اگست کی درمیانی شب بھی پاک افغان سرحد کے قریب بڑی کارروائی کی گئی تھی جس میں افغانستان سے دراندازی کی کوشش کرنے والے 33 بھارتی حمایت یافتہ خوارج کو ہلاک کیا گیا تھا۔ ترجمان کے مطابق سکیورٹی فورسز نے بروقت اور مؤثر کارروائی کر کے دہشت گردوں کی دراندازی ناکام بنائی۔ تمام کارروائیاں عوام کے تحفظ کو مدنظر رکھتے ہوئے کی گئیں۔ آئی ایس پی آر نے واضح کیا کہ پاکستان کی مسلح افواج ملکی سرحدوں کے دفاع اور امن و استحکام کو نقصان پہنچانے کی ہر کوشش کو ناکام بنانے کے لیے پرعزم ہیں اور بھارتی سرپرستی میں چلنے والے دہشت گردی کے نیٹ ورکس کا مکمل خاتمہ کیا جائے گا۔