سعودی وزارتِ حج و عمرہ نے عمرہ ویزا کے حصول کے عمل کو سہل بنانے کے لیے نئی آن لائن سروس نسک عمرہ کا آغاز کردیا ہے۔ اس سروس کے ذریعے اب زائرین بغیر کسی ایجنٹ یا ثالث کے براہِ راست ویزے کے لیے درخواست دے سکیں گے۔ وزارت کے مطابق یہ پلیٹ فارم زائرین کو ایک ہی جگہ پر ویزا اپلائی کرنے سے لے کر سفری سہولیات بک کرنے تک کا مکمل اور آسان تجربہ فراہم کرے گا۔ یہ سہولت روایتی منظور شدہ ٹریول ایجنٹس کے ساتھ ساتھ ایک اضافی آپشن کے طور پر متعارف کرائی گئی ہے تاکہ زائرین اپنی ضرورت کے مطابق مکمل پیکج یا انفرادی سہولیات کا انتخاب کرسکیں۔ حکام کا کہنا ہے کہ یہ ڈیجیٹل پلیٹ فارم 7 زبانوں میں دستیاب ہے اور سرکاری نیٹ ورکس سے منسلک ہے تاکہ ویزا کے اجراء اور دیگر خدمات میں تیزی لائی جاسکے۔ عالمی سطح پر صارفین کی سہولت کے لیے متعدد ادائیگی کے طریقے بھی فراہم کیے گئے ہیں۔ نسک عمرہ کے تحت زائرین ویزا کے ساتھ ساتھ رہائش، ٹرانسپورٹ اور مختلف ٹورز کی سہولتیں بھی آن لائن بُک کرسکیں گے۔ یہ سہولت سرکاری ویب سائٹ umrah.nusuk.sa پر دستیاب ہے۔ مزید سہولت کے لیے پلیٹ فارم پر منظور شدہ ٹریول ایجنٹس کی تفصیلات بھی دی گئی ہیں تاکہ اگر کسی کو آن لائن اپلیکیشن کے استعمال میں دشواری ہو تو وہ ان ایجنٹس کے ذریعے بھی درخواست جمع کروا سکے۔ وزارتِ حج و عمرہ کے مطابق یہ منصوبہ سعودی وژن 2030 کا حصہ ہے جس کا مقصد زیادہ سے زیادہ مسلمانوں کی میزبانی اور حج و عمرہ کی خدمات کے معیار کو مزید بہتر بنانا ہے۔