بلوچستان کے ضلع تربت میں آرمی چیف فیلڈ مارشل سید عاصم منیر نے اہم دورہ کیا جس میں سیکیورٹی کی تازہ صورتحال، جاری ترقیاتی اقدامات اور صوبے کے استحکام کے لیے سول و فوجی اداروں کے درمیان تعاون کو مزید مضبوط بنانے پر توجہ دی گئی۔ اس موقع پر وزیراعلیٰ بلوچستان، چیف سیکرٹری اور دیگر اعلیٰ حکام بھی موجود تھے۔ آئی ایس پی آر کے مطابق آرمی چیف کو ایک تفصیلی بریفنگ دی گئی جس میں دہشت گردی کے خلاف کامیاب آپریشنز، ترقیاتی منصوبوں اور جنوبی بلوچستان کے سماجی و معاشی حالات پر روشنی ڈالی گئی۔ انہوں نے حکومتی نمائندوں سے گفتگو میں بہتر طرز حکمرانی، عوامی فلاح اور بنیادی ڈھانچے کی ترقی کو امن و خوشحالی کی ضمانت قرار دیا۔ فیلڈ مارشل عاصم منیر نے کہا کہ بلوچستان کے عوام کو درپیش مسائل کے حل کے لیے سول اور فوجی اداروں کی مشترکہ کوششیں ناگزیر ہیں۔ انہوں نے اس بات کا اعادہ کیا کہ پاک فوج صوبے کے عوام کے ساتھ کھڑی ہے اور ہر ممکن تعاون جاری رکھا جائے گا تاکہ خطے میں پائیدار امن اور ترقی کو یقینی بنایا جا سکے۔ فوجی جوانوں سے ملاقات کے دوران آرمی چیف نے ان کے عزم و حوصلے کو سراہا اور کہا کہ مشکل حالات میں بھی ان کی قربانیاں اور آپریشنل تیاری قومی سلامتی کی ضمانت ہیں۔ قبل ازیں کور کمانڈر بلوچستان نے تربت آمد پر آرمی چیف کا استقبال کیا۔