خیبر پختونخوا کے شمالی اضلاع میں مکمل شدہ 32 منی مائیکرو ہائیڈل منصوبے حالیہ سیلاب سے متاثر ہوئے ہیں جن میں سے زیادہ تر منصوبے ضلع بٹگرام میں نقصان کا شکار ہوئے۔ ابتدائی تخمینوں کے مطابق ان منصوبوں کی بحالی اور حفاظتی اقدامات پر تقریباً 20 کروڑ 15 لاکھ روپے درکار ہوں گے۔ محکمہ توانائی کے اعداد و شمار کے مطابق ضلع بٹگرام میں 17 منصوبے متاثر ہوئے جن میں 16 معمولی اور ایک جزوی طور پر متاثر ہوا۔ ان منصوبوں کی کل پیداواری صلاحیت 2 ہزار 50 کلو واٹ ہے اور ان کی بحالی پر 7 کروڑ 35 لاکھ روپے درکار ہوں گے۔ اسی طرح شانگلہ میں 3، مانسہرہ میں 6، تور غر میں 2 اور بونیر میں 4 منصوبے نقصان کا شکار ہوئے۔ بونیر میں ایک منصوبہ مکمل طور پر سیلاب میں بہہ گیا۔ مانسہرہ میں 1700 کلو واٹ استعداد کے منصوبوں کو 5 کروڑ 80 لاکھ روپے جبکہ تور غر کے منصوبوں کو 30 لاکھ اور بونیر کے منصوبوں کی بحالی پر 4 کروڑ 75 لاکھ روپے درکار ہوں گے۔ رپورٹ کے مطابق سوات کے منصوبوں کا تفصیلی ڈیٹا تاحال موصول نہیں ہوا۔ مجموعی طور پر 32 منصوبوں کی پیداواری صلاحیت 4 ہزار 850 کلو واٹ ہے جن میں سے 20 منصوبے 200 کلو واٹ سے کم اور 12 منصوبے 200 کلو واٹ یا اس سے زائد استعداد کے ہیں۔ یہ ابتدائی تخمینہ رپورٹ ہے جو عارضی جائزے کی بنیاد پر تیار کی گئی ہے، حتمی لاگت مزید تفصیلی سروے کے بعد سامنے آئے گی۔