سعودی عرب کے قریب سمندر میں سب میرین کیبل کٹنے سےپاکستان بھر میں انٹرنیٹ سست روی کا شکار ہےجس کے باعث صارفین کو انٹرنیٹ کی رفتار میں کمی کا سامنا ہے۔ ترجمان پی ٹی سی ایل کے مطابق خرابی کے نتیجے میں SMW4 اور IMEWE سب میرین کیبلز کی بینڈوڈتھ جزوی طور پر متاثر ہوئی ہے جس کی وجہ سے مصروف ترین اوقات میں انٹرنیٹ سروس کی اسپیڈ کم ہو سکتی ہے۔ پی ٹی سی ایل کے مطابق مقامی ٹیمیں صارفین پر اثرات کو کم سے کم کرنے کے لیے متبادل بینڈوڈتھ فراہم کرنے پر کام کر رہی ہیں جبکہ بین الاقوامی شراکت دار ادارے خرابی کو ترجیحی بنیادوں پر دور کرنے کی کوشش کر رہے ہیں۔ ترجمان نے کہا کہ ہم ہر ممکن اقدامات کر رہے ہیں کہ صارفین کو کم سے کم مشکلات کا سامنا ہو۔انہوں نے مزید کہا کہ کمپنی اپنے صارفین کے تعاون اور صبر و تحمل کی شکر گزار ہے۔