وفاقی دارالحکومت میں ناقص اور ملاوٹی دودھ کی فروخت کے خلاف اسلام آباد فوڈ اتھارٹی کی بڑی کارروائی سامنے آئی ہے۔ فوڈ اتھارٹی ٹیم نےسیکٹر جی-12 میں قائم ایک ملک سینٹر پر چھاپہ مارا، جہاں اسکِم ملک پاؤڈر اور گھی کی مدد سے مصنوعی دودھ تیار کیا جا رہا تھا۔کارروائی کے دوران مشینری، گھی کے ٹین اور ملک پاؤڈر ضبط کرلیا گیا۔ دوران انسپکشن دودھ کے نمونے لکٹوسکین مشین پر ٹیسٹ کیے گئے جو معیار پر پورے نہ اترے۔ ڈپٹی ڈائریکٹر آپریشنز اسلام آباد فوڈ اتھارٹی کے مطابق ملک سینٹر کے پاس اتھارٹی کا لائسنس بھی موجود نہیں تھا۔ ڈاکٹر طاہرہ صدیق کا کہنا ہے کہ ٹیم نے موقع پر ہی ایک ہزار لیٹر ملاوٹی دودھ تلف کردیا اور سینٹر کو فوری طور پر سیل کردیا گیا۔ ان کا مزید کہنا تھا کہ ناقص اور ملاوٹی دودھ کی فروخت ہر گز برداشت نہیں کی جائے گی اور صارفین کو صحت مند اور معیاری خوراک کی فراہمی یقینی بنانے کے لیے ایسے مراکز کے خلاف سخت کارروائیاں جاری رہیں گی۔