فرانس کے دارالحکومت پیرس کے علاقے کی مختلف مساجد کے باہر نو سُؤروں کے سر ملے ہیں جس کے بعد پولیس نے معاملے کی تحقیقات شروع کردی ہیں۔فرانسیسی خبر رساں ایجنسی اے ایف پی کے مطابق سٹی پولیس کے سربراہ لوراں نونیز نے ’ایکس‘ پر ایک بیان میں بتایا کہ ’اس نفرت انگیز معاملے کی ہر ممکن حد تک تحقیقات کی جائیں گی۔‘مقامی حکام کا کہنا ہے کہ ’سؤروں کے 6 سر عوامی گزرگاہ سے ملے ہیں جبکہ تین سر قریبی علاقوں سے برآمد ہوئے ہیں۔‘ فرانس کے وزیر داخلہ برونو ریتییو نے کہا ہے کہ ’اس طرح کے واقعات قابل مذمت، اشتعال انگیز اور ناقابلِ قبول ہیں۔‘ان کا مزید کہنا تھا کہ ’میں اپنے ہم وطن مسلمانوں سے کہتا ہوں کہ وہ اپنے مذہبی فرائض پُرامن انداز میں جاری رکھیں۔‘پیرس کی جامع مسجد کے ریکٹر حافظ شمس عدین نے ’اسلامو فوبیا کی کارروائیوں‘ کی مذمت کرتے ہوئے اسے مسلمان مخالف نفرت میں اضافے کا ایک نیا اور افسوسناک مرحلہ‘ قرار دیا ہے۔واضح رہے کہ یورپی یونین میں سب سے بڑی کمیونٹی مسلم فرانس میں رہتی ہے اور اس کے ساتھ ساتھ اسرائیل اور امریکہ سے باہر یہودیوں کی سب سے بڑی آبادی بھی یہیں مقیم ہے۔یورپی یونین کی ایجنسی برائے بنیادی حقوق کے مطابق ’اکتوبر 2023 میں غزہ جنگ شروع ہونے کے بعد سے یورپی یونین کے کئی ممالک میں مسلمانوں کے خلاف نفرت اور صہیونی مخالف جذبات میں اضافے ہوا ہے۔فلسطین کے عسکریت پسند گروپ حماس نے 7 اکتوبر 2023 کو غزہ سے اسرائیل پر حملہ کیا تھا جس کے جواب میں اسرائیل نے غزہ کی پٹی پر مسلسل حملے جاری رکھے ہوئے ہیں۔