ماورا حسین بطور لیلیٰ ڈرامہ جمع تقسیم میں اپنی اداکاری سے دل جیت چکی ہیں اور اب وہ اس کردار کے ذریعے سیکھے گئے سبق شیئر کر رہی ہیں۔ انہوں نے ایک حالیہ انٹرویو میں بتایا کہ کس طرح لیلیٰ نے انہیں برداشت، حدود قائم کرنے اور احترام برقرار رکھنے کا ہنر سکھایا، اور کیسے ان کی اپنی ازدواجی زندگی نے اس کردار کو سمجھنے میں مدد دی۔ ماورا حسین کہتی ہیں: "مجھے لیلیٰ سے یہ سیکھنے کو ملا کہ آپ اختلاف بھی کر سکتے ہیں، اپنی حدود بھی طے کر سکتے ہیں اور پھر بھی احترام برقرار رکھ سکتے ہیں۔ جذبات میں بہہ جانا بہت آسان ہوتا ہے، لیکن اصل طاقت اس بات میں ہے کہ آپ اپنی بات سمجھداری سے رکھیں۔ مثال کے طور پر، اگر میں ماورا بطور خود وہ واقعہ جھیلتی جس میں لیلیٰ سے لباس بدلنے کے لیے کہا گیا تھا، تو شاید میں زیادہ ردعمل دیتی، لیکن لیلیٰ نے اسے بڑے تحمل سے لیا، اور یہی اس کردار کا حسن ہے۔" انہوں نے بتایا کہ شادی کے صرف دس دن بعد وہ شوٹنگ پر واپس آگئیں، اور اسی تجربے نے انہیں لیلیٰ کے جذبات سمجھنے میں بہت مدد دی۔ "میں نے اس ڈرامے کی شوٹنگ اپنی شادی کے دس دن بعد شروع کی۔ ظاہر ہے میری زندگی اور لیلیٰ کی زندگی مختلف ہیں، لیکن میں ایک نئی دلہن کے احساسات اور نرمی کو سمجھ سکتی تھی، اسی لیے میں لیلیٰ کے دل کی کیفیت محسوس کر پاتی تھی۔" ڈرامہ جمع تقسیم میں سسرالی رشتوں، سمجھوتوں اور مشترکہ خاندانی نظام کی کڑوی حقیقتوں کو دکھایا جا رہا ہے۔ ہر کردار حقیقی دنیا کا عکس محسوس ہوتا ہے، اور یہی وجہ ہے کہ ناظرین خود کو کسی نہ کسی کردار میں دیکھ رہے ہیں۔ ماورا کا کہنا ہے کہ اس ڈرامے نے صرف کرداروں کی زندگی نہیں بدلی بلکہ حقیقی زندگیوں پر بھی اثر ڈالا۔ ایک جذباتی واقعہ بیان کرتے ہوئے ماورا نے بتایا: "ایک لڑکی میرے پاس آئی، اس کی آنکھوں میں آنسو تھے۔ وہ اکلوتی بیٹی تھی اور اس کی منگنی ایسے گھرانے میں ہوئی تھی جو قیس کے خاندان جیسا تھا۔ اس کی والدہ نے اسے جمع تقسیم دکھایا تاکہ وہ سمجھ سکے کہ وہ کس ماحول میں جا رہی ہے۔ ڈرامہ دیکھنے کے بعد اس نے منگنی ختم کر دی کیونکہ اس نے خود کو اس صورتحال میں قید محسوس کیا۔" ماورا کے مطابق یہی ایک فنکار کی کامیابی ہے کہ اس کے کردار لوگوں کی زندگی میں روشنی لائیں، ان کے فیصلوں میں رہنمائی بنیں اور انہیں اپنی قدر پہچنوائیں۔ یہ وہ لمحہ ہے جب فن محض اسکرین تک محدود نہیں رہتا بلکہ زندگی بدلنے والی حقیقت بن جاتا ہے۔ جمع تقسیم صرف ڈرامہ نہیں، ایک آئینہ ہے جو خاندان، رشتے، محبت اور خودداری کی تصویر کا دوسرا رخ دکھاتا ہے۔