بھارتی کرکٹ بورڈ کے سیکریٹری دیوا جیت سائیکیا نے اس بات کی تصدیق کی ہے کہ وہ آئندہ ماہ ہونے والی انٹرنیشنل کونسل کی میٹنگ میں ایشیا کپ ٹرافی کا معاملہ اٹھائیں گے۔ دیوا جیت نے کہا ہے کہ جو 4 سے 7 نومبر تک آئی سی سی کی بورڈ میٹنگ ہوگی اس میں بھارت اس معاملے پر بات کرے گا کہ اب تک ایشیا کپ 2025 کے ٹرافی بھارتی ٹیم کو کیوں نہیں دی گئی ہے۔ ذرائع نے بتایا بھارتی کرکٹ بورڈ پاکستان کرکٹ بورڈ اور ایشین کرکٹ کونسل کے چیئرمین محسن نقوی کے خلاف بھی کوئی ایکشن لینے کی بات کرے گا۔ یاد رہے کہ بھارتی کرکٹ ٹیم نے محسن نقوی سے ایشیا کپ کے فائنل کے بعد ٹرافی لینے سے یہ کہہ کر انکار کردیا تھا کہ وہ ایک سیاسی شخصیت اور پاکستان کے انٹیریئر منسٹر بھی ہیں۔ اس واقعے کے بعد سے ایشیا کپ کی ٹرافی اب تک ایشین کرکٹ کونسل کے دفتر میں موجود ہے اور محسن نقوی نے بھی سخت موقف اپنایا ہے کہ اگر بھارتی ٹیم کو ٹرافی چاہیے تو ان کا کوئی نمائندہ آکے پوری کوریج کے ساتھ ان سے وصول کریں۔ پاکستان بھارتی کرکٹ بورڈ کے تعلقات ایشیا کپ کے بعد سے مزید خراب ہوئے ہیں، آئی سی سی کی بورڈ میٹنگ میں بائے لیٹرل کرکٹ کے مستقبل اور آئندہ ہونے والی چیمپینز ٹرافی پر بھی بات چیت ہوگی۔