انٹرنیشنل ہاکی فیڈریشن نے پاکستان کی جگہ عمان کی ٹیم کو جونیئر ورلڈ کپ ہاکی میں شامل کرلیا ہے۔ پاکستان ہاکی فیڈریشن نے ایف آئی ایچ پر واضح کر دیا تھا کہ وہ اپنی ٹیم جونیئر ورلڈ کپ میں کھیلنے کے لیے موجودہ حالات میں بھارت نہیں بھیج سکتے۔پاکستان ہاکی فیڈریشن نے مطالبہ کیا تھا کہ ان کے میچز کسی نیوٹرل وینیو پہ کرائے جائیں لیکن ایف آئی ایچ نے ان کا یہ مطالبہ رد کرتے ہوئے عمان کی ٹیم کو ان کی جگہ شامل کردیا ہے۔ یاد رہے کہ دو ماہ قبل بھارت میں ہونے والے ایشیا کپ ہاکی میں کھیلنے کے لیے پاکستان کی ٹیم بھارت نہیں گئی تھی اور ان کی جگہ بنگلہ دیش کی ٹیم کو شامل کرلیا گیا تھا۔ پاکستان کی فیڈریشن کے سیکریٹری رانا مجاہد نے کہا کہ ایف آئی ایچ کی اگلی میٹنگ میں اس بات کو اٹھایا جائے گا کہ آئندہ ایف آئی ایچ بھارت میں انٹرنیشنل ایونٹس کرانا فی الحال بند کردے۔ انہوں نے کہا کہ جونیئر ورلڈ کپ ایک اچھا موقع تھا کہ پاکستان کے نوجوان کھلاڑیوں کو جانچا جائے لیکن موجودہ حالات میں کسی صورت میں بھی پاکستان کی ٹیم کو کسی بھی ایونٹ کے لیے بھارت نہیں بھیجا جاسکتا اور ایف آئی ایچ کو اس بات کو مدنظر رکھنا پڑے گا۔